Direktor sa PDEA-7 may death threat

CEBU, Philippines – Direktor sa Philippine Drugs Enforcement Agency (PDEA-7) nga si Randy Pedroso dunay hulga sa kinabuhi sumala pa sa director general sa maong ahensya sa gobiyerno nga si Director General Dionesio Santiago kinsa niduaw dinhi sa Sugbu.

Si Santiago kinsa mianhi sa Sugbu alang sa signing of memorandum of agreement tali sa mga non-government organization nga misaad motabang sa kampanya batok sa illegal drugs, mibutyag dili kini angayang kahadlukan sa iyang mga sakop.

Si Pedroso dihang gihinabi sa Banat News nagkanayon nga dili lang siya maoy dunay hulga sanglit tanang regional directors sa ilang ahensya ang nakadawat niini.

Apan alang kaniya wala kini makaapekto sa iyang gimbuhaton paggukod niadtong mga tawong nalambigit sa illegal nga drugas.

Sumala pa niini nga ang mga pagpanghulgang nadawat sa mga sakop sa PDEA pagmatuod lang nga epektibo ang ilang kampanya batok sa mga drug syndicates tungod kay naapektahan gyud ang ilang operasyon.

Wala hinuon ipadaplin ni Pedroso ang maong mga hulga sanglit sukad pa kaniadto wala na sila magkumpiyansa.

Kahinumduman nga ang usa sa mga sakop sa PDEA-7 nga si FO3 Priscillano Gingoyon gibanhigan samtang nagpadulong sa iyang balay diha sa dakbayan sa Lapulapu, migawas sa imbestigasyon nga mga grupo sa mga drug personalities ang nalambigit sa maong krimen.

Apan bisan paman niini, giklaro ni Pedroso nga walay rason nga mahadlok siya ug ang iyang mga kaubanan sa mga sindikato sa illegal nga drugas ug midugang nga kuyaw pa ang kaniadto iyang assignment dihang diha pa siya sa Philippine Army ug nadestino sa Mindanao.

Ang nakigpirmahay og kasabutan sa PDEA mao ang Pagpakabana RGMA-7, Centennial Force Foundation Inc.; Philippine Guardians Brotherhood Inc.; PDEA-Bohol Chapter ug Young Lawyers Association of Cebu. - Guam Logroño (BANAT NEWS)