Laing fan ni Pacman giatake, patay

CEBU, Philippines – Laing fan sa bag-ong International Boxing Organization light-welterweight champion Manny “Pacman” Pacquiao ang gikatahong namatay samtang nagtan-aw sa away sa Pinoy boxer batok sa Briton nga si Ricky “The Hitman” Hatton niadtong Domingo sa udto sa sitio Humay-Humay sa barangay Cordova sa dakbayan sa Lapulapu.

Sa lungsod sa Naga, usa ka drayber sa traysikol nga giilang si Gregorio Alingalan ang gidala sa tambalanan human usab kini giingong giatake sa sakit sa kasing-kasing human sa kadaugan ni Pacquiao.

Sumala pa sa igsuon niini, naguol si Alingalan ug gianugnan nga wala makapusta kang Pacquiao kinsa mipatikangkang kang Hatton sulod sa tulo ka higayon hangtud nga kini napukan sa second round.

Sa dakbayan sa Lapulapu, si PO1 Rejie Fernandez sa homicide section sa kapolisan sa maong dakbayan miila sa biktima nga mao si Abel Ala, 54, lumad nga taga dakbayan sa Marawi, minyo ug nagpuyo sa maong dapit.

Matud pa ni PO1 Fernandez nga sayo pa sa buntag niadtong Domingo ang biktima kuyog sa mga silingan nag-atang sa “live” coverage sa telebisyon sa away ni Pacquiao ug Hatton.

Giingong gibati kini og tumang kakulba nga mapilde ang giidolong boksidor nga sama kaniya lumad usab nga taga Mindanao.

Gikatahong samtang nagpadayon ang pagpaabot sa main bout nagpunay na kini og barog dayon molingkod na usab ug dili mahimutang sa iyang gilingkoran.

Daw nabitin ang gibating kakulba ug kahinam si Ala nga nagtan-aw sa telebisyon tungod sa daghang commercials hangtod nga kalit lang kining nahunlak sa lingkoranan ug nawad-an sa panimuot.

Dali kining gitabang ug gidala sa Mactan Doctors Hospital sa maong dakbayan apan gideklarar kini sa mga doktor nga dead on arrival. - Romeo Limpangog (BANAT NEWS)