Tinun-an sa publiko modaghan

CEBU, Philippines – Gipaabot nga mosaka ang gidaghanon sa mga tinun-an sa pampublikong mga tunghaan sa dakbayan sa Sugbu sa sunod tuig-tingtungha.

Kini tungod usab sa krisis nga nasinati sa nasod ug napanglantawan nga daghang mga tinun-an gikan sa pribado ang ibalhin ngadto sa publikong mga tunghaan.

Tungod niini, padayon karong nangandam ang kadagkuan sa Cebu City Schools Division alang sa pagbukas sa klase sunod buwan.

Matud ni Cebu City Schools Division Superintendent Doctor Lorna Rances nga partikular nilang gipangandaman ang pagdugang og mga lawak saringan.

“Amo na nang gipangandaman, nagsige na mi og meeting bahin ana, lakip na sa security measures nga ipatuman diha sa mga tunghaan,” sumala ni Rances.

Mapasalamaton si Rances sa kagamhanan sa dakbayan nga giingong kanunay mutabang sa panginahanglan sa mga tinun-an.

Gani niingon si Rances nga dugang mga lawak-saringan ang gipasalig sa City government nga tukuron niining tuiga sa nagkadaiyang tunghaan.

Nasayran nga sa miaging school year dunay kinatibuk-ang 141,372 ka mga tinun-an nga na-enroll sa publikong mga tunghaan sa dakbayan diin 94,987 sa elementarya.

Duha ka porsiyento lang hinoon ang labing taas nga nakita ni Rances nga increase sa enrollment sa umaabot nga tuig-tingtungha.

“Sukad sa akong pag-asumir diri sa City naobserbahan nako nga kasagaran dos porsyento ra man ang maximum nga increase,” dugang pamahayag ni Rances.

Subay niini subling nanawagan ang City Schools Division Superintendent ngadto sa mga ginikanan nga ipa-enroll na ang mga anak niini.

Kini aron dili magpunsisok ug mag-ilugay sa adlaw nga mubukas na ang klase ug makasugat na hinoon og problema sa ilang pagpalista.

Gitataw ni Rances nga libre ug walay bisan unsang voluntary contribution nga kolektahon ang mga magtutudlo atol sa enrollment. - Elly Bolonos (BANAT NEWS)