Batang polio gilabay sa Papa

CEBU, Philippines – Lawas sa patay nga bata nga nakit-an sa usa ka fishpond niadtong Abril 25 sa buntag didto sa Sitio Lusimba, barangay Basak Pardo nasuta nga gilabay diay sa iyang kaugalingong amahan. Gisikop sa mga barangay opisyal ug gitanggong sa karsel sa kapolisan ang amahan nga si Arsenio Trasmil, 50, usa ka panday nga taga Cabreros, Back Rubberworld barangay Basak, Pardo.

Kini human miangkon nga iyang gisulod og sako ang kaugalingong anak nga si Michael Trasmil, 13, kinsa usa ka polio ug special child sa dihang namatay kini niadtong Abril 24 ug gilabay sa fishpond sa Basak, Pardo duol sa South Reclamation Project (SRP) niadtong   Abril 25.

Si Arsenio nagkanayon nga ang iyang anak nga si Michael lima ka adlaw kining nagluya sa wala pa mamatay gumikan sa grabeng plema tungod sa pulmonia ug gani maglisod kini og kaon.

Sumala pa niini nga niadtong Abril 24, Biyernes iya pa kining gipakaon sa wala pa siya motrabaho sa pagpamanday sa ilang silingan. Gibalik niya pagka-alas 3 sa hapon samang adlaw apan sa iyang pagbalik mao nalay iyang nakit-an nga giatake na sa sulom ang baba niini ug wala nay kinabuhi.

Sa iyang kataranta pagka Sabado na niya gisulod sa dakong sako ang bata ug gidala sa pagatpatan sa dagat nga may fishpond ug gipahigda nga gihanigan sa laing sako.

“Wa nako masayod sa akong buhaton niadtong higayona nag-problema ko kay sukad 3 anyos pa gibiyaan na mi sa akong asawa. Gawas pa wala koy igasto sa lubong gumikan sa problema sa kwarta hinungdan nga gisulod nalang nakog sako ug gilabay sa fishpond,” sumala pa ni Trasmil.

Dugang pa niini nga tuyo usab niya nga gibutang duol sa pagatpatan nga adunay gibutang nga mga baling sa panagat aron usab makit-an sa mga tawo ang patay’ng lawas sa iyang anak.

Apan niadtong Domingo Mayo 3 nakunsensiya siya hinungdan nga iyang giadto sa punerarya ang iyang anak ug nangayo’g pakitabang sa mga opisyal sa barangay aron malubong kini.

Si Sr. Supt. Patrocinio Comendador, direktor sa kapolisan sa dakbayan sa Sugbo nagkanayon nga kasong parricide ang ilang giandam nga ipasaka batok kang Trasmil.

Matud pa ni Comendador nga base sa mga sirkumstansya sa kamatayon sa anak niining si Michael wala sila makombinser sa mga pamahayag sa amahan niini.

Sumala pa ni Comendador nga dili rason ang kapobrehon sa usa ka tawong dili niya mapahimutang sa tarong ang lubong sa iyang anak.

Gipasabot niini nga tataw kaayo nga adunay gitagoan ang amahan labot sa kamatayon sa iyang anak nga angayan untang ipahibalo niini sa kapolisan.

Nasayran sa Banat News nga ang mga silingan naka-alinggat nga daw wala na nila madungog ang tingog sa biktima nga matag adlaw naandan niining   magpunay sa paghilak.

Apan ang amahan gikatahong igo lang mipadayag sa iyang mga silingan nga kun adunay mangitang polis ipa-ingon lang nga gikuha sa iyang mama ang bata nga tua na sa Mindanao.

Kahinumduman nga niadtong milabay’ng bulan unang gika-report nga adunay batang gigapos nga gilabay sa fishpond sa nahisgutang dapit sa dihang nakit-an sa duha ka mga batan-ong nanguha'g kahoy. – BANAT NEWS