CEBU, Philippines - Masaligon si Undersecretary Atty. Clarence Paul Oaminal sa Dangerous Drugs Boards nga makonbikto ang 14 ka mga akusado sa Mega Shabu Laboratory nga gironda sa mga awtoridad niadtong 2004 diha sa dakbayan sa Mandaue.
Si Oaminal masaligon sa dihang gikahinabi sa Banat News nga mopasulabi gyud ang kamatuuran batok sa 14 ka suspetsado sa shabu laboratory nga miresulta sa pagkasakmit sa gatusan ka libong kilo sa mga kemikal nga sagol sa shabu.
Ang panglantaw ni Oaminal sa kombiksyon unya sa mga suspetsado may labot kini sa impormasyong migawas nga nagselebrar nang daan ang mga akusado sulod sa ilang bilanggoan sa Mandaue City Jail sa ilang kadaugan sa maong kaso.
Sa report nga nakuha sa Banat News gikan sa usa ka kasaligang tinubdan giingong ang mga akusado nagpapalit og litson ug gipakaon sa mga kaubang priso sulod sa Mandaue City Jail dungan sa pagpahibalong segurado na silang maabswelto sa ilang kaso.
Apan si Oaminal mipasidaan nga di pa angayang magmaya ang mga akusado tungod kay dako kaayo ang posibilidad nga gilingla lang sila sa ilang mga abogado.
Sumala pa ni Oaminal nga nahuman na sa pagduso sa prosecution ang tanang mga ebidensya nga gihulagway niyang bug-at kaayo batok sa mga akusado ug ang gihimo karon sa depensa usa nalang ka paglangay-langay sa kaso.
Gibutyag niini nga mobalik ang hearing sa kaso karong bulan sa Hunyo ug ang depensa na maoy gipaabot nga mopagawas sa ilang mga ebidensya nga moalkontra sa prosekusyon.
Gihimong sanglitanan ni Oaminal nga ang usa ka inilang drug lord didto sa kaulohan nga si Jackson Dy ang gikombikto niadtong April 29 ning tuiga human madakpi niadtong 2003 ug kapin sa libo ka kilogramos nga ephedrine ingon man 350 ka kilograms nga shabu.
Matud pa niini nga nagbunga ang kakugi sa mga awtoridad sa ilang kahago sa pipila ka tuig nga pagpaabot sa desisyon sa maong kaso. – BANAT NEWS