... hatagan og victory party sa siyudad

CEBU, Philippines - Hatagan sa kagamhanan sa dakbayan sa Sugbo og mabulukong victory party ang bag-o lang nahimong kampeyon sa IBO light-welterweight division nga si Manny “Pacman” Pacquiao.

Kini maoy gipasalig ni acting Mayor Michael Rama human usab palukapaha ni Pacman ang kanhi kampeyon ang usa ka Briton nga si Ricky “Hitman” Hatton.

Kaduha napakamang si Hatton sa 1st round, apan sa nahabiling 8 segundos sa 2nd round, wala na makabangon si Hatton dihang naigo sa left hook ni Pacman.

Tahasan ni Rama nga makig-alayon sa kampo ni Pacquiao alang sa victory party mao si Konsehal Raul Alcoseba ug City Administrator Francisco Fernandez.

Matud ni Rama nga angayan lang hatagan og pasidungog si Pacman tungod kay kini giingong nakahatag og dakong dungog sa mga Pilipino sa tibuok kalibutan.

Gani nisugyot ang acting mayor nga ilhon usab si Pacquiao sa nasudnong kagamhanan isip “Super Tourism Promoter”.

Miingon si Rama nga pinaagi ni Pacquiao dili na angayang mugasto pa ang gobyerno og dakong kantidad sa salapi pag-promote sa nasud.

Sa pikas bahin gidasonan sa acting mayor ang pamahayag ni boxing promoter Bob Arum nga si Pacquiao na maoy labing bantugan nga fighter nga nagpuyo karon sa kalibutan.

Nagkanayon si Rama nga ang kadaugan ni Pacman kang Hatton maoy nagpamatuod nga kini na maoy labing maayo nga boksidor sa kasamtangang panahon.

“His win erases the doubts in his greatness of the World and no one now, in a way, can question and dispute his greatness,” sumala ni Rama. – BANAT NEWS