CEBU, Philippines – Apektado ang mga negosyante og litson dinhi sa Sugbo sa isyu bahin sa ‘swine flu’ nga mipatay na og 170 ka tawo didto sa Mexico.
Si Norma Jandayan ang officer-in-charge sa Helen's Special Lechon sa Talamban, dakbayan sa Sugbo , mibutyag sa Banat News nga mikibra gyud ang ilang halin matag adlaw og 30 ngadto sa 50 porsiyento kay wala na kaayoy mangaon og inasal.
Matud pa ni Jandayan nga tungod sa nabaniog nga balita bahin sa peligrosong swine flu nga gikatahong nagagikan sa Mexico ug nakatap na ngadto sa Estadus Unidos, Canada, New Zealand, Britain, Germany, Spain, Israel, Austria, Switzerland ug The Netherlands, ang madawat nilang order sa litson matag adlaw puwerti nalang dyutaya, usahay 10 nalang kabuok.
Samtang si Mary Baclayon, ang secretary ni Capasite Alejo, tag-iya sa Alejo's lechon sa Labangon ning siyudad sa Sugbu mitaho usab nga natibhangan gyud og 10 porsiyento ang ilang halin matag adlaw.
Matud pa ni Baclayon nga matag adlaw may 20 ka inasal gyud ang orderon sa ilang mga suki gikan sa ilang tindahan, apan sa pagkakaron dyutay nalang kaayo kay ang mga tawo naglikay na sa pagkaon og inasal.
Nagtuo siya nga ang pagminus sa ilang kita mao ang kahadlok sa mga tawo bahin sa swine flu luyo sa mga pasalig nga gihimo sa mga tinugyanan sa Department of Health ( DOH) nga dili angayang kabalak-an kining maong matang sa sakit dinhi sa nasud.
Ang ubang mga negosyante og litson sa dakbayan sa Talisay kinsa nagdumili sa pagbutyag sa ilang ngalan nagkanayon nga sukad moulbo ang balita bahin sa swine flu, mangyamiid na ang mga tawo nga magtan-aw sa magsinaw-sinaw nga bukobuko sa ilang inasal.
Gani may mga tawo gyud nga maglaway magsud-ong sa mag-aso-aso nga inasal apan nagtuo ang mga negosyante nga dili lamang swine flu ang nakapugong kanila sa pagpalit, kundi ang pagkawala gyud nilay kuwarta busa, magpaduol nalang sa litsonan aron lang mabusog sa baho sa inasal.
Hinuon ilang gitataw nga mobalik ra gihapon ang ilang naandang gidaghanon sa kita sa higayon nga matin-aw na ang maong isyu. – BANAT NEWS