Natabuna'g balas namatay

CEBU, Philippines – Namatay ang usa ka lalaki dihang natumpagan kini sa balas diha sa giingong illegal quarry sa sapa sa Butuanon River, sa Sitio Lub-ang, barangay Tingob, dakbayan sa Mandaue, sa miaging gabii.

Ang biktima mao si Leo Navarro, 27, taga barangay Casuntingan sa maong dakbayan.

Si PO3 June Mondejar sa Casuntingan Police Station 4, mibutyag sa Banat News nga dunay kauban si Navarro nga iyang silingan nga si Junever Yano niadtong tungura nga nangubkob og balas.

Miingon si PO3 Mondejar nga samtang nagkubkob sa balas ang duha, wala nila mabantayi ang kalit nga pagkatumpag sa ilang pinundok nga balas sa ibabaw sa ilang kinubkoban ug mitam-ok kang Navarro nga nakapatumba niini ug wala na makabangon.

Matud pa ni PO3 Mondejar nga ang kakusog sa pagkahagsa sa balas ug sa gibug-aton niini maoy nakapatay sa biktima kinsa wala na makaginhawa diha sa ilawom.

Sumala pa sa kapolisan, si Yano wala matumba ug nakadagan gikan sa iyang gibarogan.

Ang mga lumolupyo sa maong dapit nga nakamatikod sa maong hitabo maoy mikubkob sa bas nga mitabon kang Navarro ug dihang nahulbot nila ang biktima, gihatod dayon nila ngadto sa Mandaue City District Hospital apan gideklarar kining dead on arrival.

Si Yano gipangita pa karon sa kapolisan aron maimbestigar kalabot sa maong hitabo. Apan sa laing impormasyong nakaylap sa kapolisan gikatahong ang biktima mamalitay ra og balas sa kantidad nga P20 ug dugay na niya kining gihimo. - Romeo Limpangog uban sa report ni Bong Soriano (BANAT NEWS)