State of calamity sa dumpsite gikwestyon

CEBU, Philippines – Gipalabang nga resolusyon sa Mandaue City Disaster and Coordinating Council nga nagtinguhang madeklarar nga state of calamity ang dumpsite sa barangay Umapad nagkinahanglan pa og pagtuon sa konseho.

Kini ang gipadayag ni Konsehal Emiliano Rosal, chairman sa committee on budget and appropriations sa konseho sa dakbayan nga nahinabi sa Banat News kagahapon. Gipasabot niya nga angayang sutaon kun angayan bang madeklarar nga state of calamity ang labayanan og mga basura sa maong barangay tungod kay wala may mga residenteng direktang naapektahan niini.

Matud pa niya nga ang pagdeklarar sa usa ka dapit nga state of calamity nangahulugan nga naa sa makuyaw nga kahimtang ang mga lumolupyo kini sama sa sunog, bagyo, baha, landslide ug uban pa.

Giklaro niya nga ang programa sa tukmang paglabay sa basura dugay na nga gipatuman sa dakbayan ug ang angayang buhaton mao na lang ang pagpalambo niini.

Si Mayor Jonas Cortes nga mibalhin sa iyang buhatan sa dumpsite sa barangay Umapad nakigtigom sa mga sakop sa CDDC sa miaging adlaw aron mangita og pamaaging matagad ang problema sa paglabay sa basura sa maong lugar.

Giingong ang duga ug uban pang polusyon gikan sa maong dumpsite nakita nga hulga na karon sa kinaiyahan partikular diha sa Mactan Channel.

“There is an urgency for a concerted action so we can prevent further environmental damage,” pamahayag ni Mayor Cortes. - Romeo Limpangog (BANAT NEWS)