Minibus midumbol sa 2 ka multicab; 1 patay, 4 angol

CEBU, Philippines – Usa ang patay ug upat ang naangol sa dihang midumbol ang de pasaheroang minibus sa gisundan niining duha ka de pasaheroang multicab ug trak de karga ug napagan pa ang tulo ka nag-parking nga motorsiklo nga gihimong habal habal didto sa barangay Tungkop, lungsod sa Minglanilla niadtong Huwebes sa alas 9 sa gabii.

Ang namatay mao ang konduktor sa minibus nga naila lang sa ngalan nga si Loloy nga nagbiyahean og Carcar Cebu City nga gimaneho sa usa ka Isagani Tanudtanod, hingkod ang panuigon, ug molupyo sa siyudad sa Carcar.

Samtang ang mga naangol mao si Dominga Minerva, 62, molupyo sa Tunghaan, Minglanilla ug pasahero sa multicab, Ronel Ginerez, 15, taga siyudad sa Carcar ug pasahero sa minibus, Raul Geneda, 46, taga Tinaan, siyudad sa Naga ug pasahero sa minibus ug Rogelio Deroy, 30, taga Tagunol, siyudad sa Sugbo ug pasahero sa minibus.

Matud ni PO1 Jade Abrica sa Minglanilla Police Station sa dihang nahinabi sa Banat News subay sa blotter nga gibasehan niini ang nadumbolan nga de pasaheroan nga multicab nga gimaneho ni Welmar Ganojala, taga siyudad sa Naga, laing multicab nga pasaheroan nga Colon, San Fernando ang rota nga gimaneho ni Rogelio Deroy, ug ang cargo truck nga nagkarga og mga softdrinks, ug napagan pa ang tulo ka habal-habal nga nag-parking daplin sa karsada ingon man ang nagbisiklita nga ballot vendor nga si Reynaldo Capa.

Subay sa inisyal nga imbestigasyon sa kapolisan kusog kaayong nagpadagan ang minibus gikan sa siyudad sa Sugbo paingon sa Carcar ug puno sa mga pasahero ug pag-abot sa crossing nga karsada sa maong lugar kalit lang usab nga mitabok sa highway ang cargo truck nga nagkarga og mga softdrinks ug naalanganin na sa pag-break ang minibus hinungdan nga iya na lang kining gilihayan ug natagak ang konduktor nga maayong pagkapantok sa ulo sa semento nga karsada ug didto modumbol ang minibus sa gisundan niining multicab nga de pasaheroan.

Apan tungod sa kakusog sa impact gidaro usab sa maong multicab   ang gisundan niining lain pang multicab nga pasaheroan una pa modasmag sa nag-parking nga tulo ka habal-habal ug napagan ang nagbisiklita nga ballot vendor ug maayo na lang gani kay nakaambak dayon kini ug ang mga tinda lang niining balot ug ang bisiklita ang nagupok.

Human sa maong hitabo misibat ang drayber sa minibus ug kagahapon sa buntag didto na kini motahan sa kapolisan sa siyudad sa Carcar ug gi-turnover usab dayon sa kapolisan sa Minglanilla ug nabalhog na karon samtang nagpaabot sa tukmang kaso nga ipasaka batok niya. - Darrel A. Carumba (BANAT NEWS)