P125 usbaw sa suweldo subling gibanhaw sa labor

CEBU, Philippines – Gibanhaw pagbalik sa mga labor groups ang gipangayong P125 nga usbaw sa minimum nga suholan sa gipahigayong rally kagahapong adlawa atol sa kasaulogan sa Labor Day.

Si Wennie Badayos, chairman sa Kilusang Mayo Uno ug Ama-Sugbu sa pakighinabi sa Banat News kagahapon nagkanayon nga padayon silang mga mamumuo sa pakigbisog nga ihatag sa gobiyerno ang hustong suholan sa mga mamumuo.

Kini tungod kay, matud ni Badayos nga daghan sa mga mamumuo ang nag-antos sa kamahal sa mga nag-unang palaliton apan ang suweldo dili na paigo.

Gibasol usab sa mga militante ang administrasyong Gloria Macapagal Arroyo lakip na mga kapitalista nga maoy nakaingon nga naapektahan sa kalibutanong krisis ang Pilipinas ug maoy hinungdan sa pagpanaktak sa mga trabahante.Gipasabot ni Badayos nga niadto pang 2003 napasar ang P125 across the board nga umentong suhulan sa ilang mga kaubang Kongresista sa hawanan sa Kongreso apan giingong gimaniobra pag-abot na ngadto sa Senado hinungdan nga wala gyud kini mahimong balaod hangtud karun.

Gitataw ni Badayos nga hangtud di mahatag ang ilang yangungo magpadayon ang mga mamumuo sa pagsinggit niini diha sa kadalanan.

Naglaraw ang pundok nga molusad sa sunod bulan og halapad nga welga dinhi sa kinatibuk-ang Central Visayas lakip na dinhi sa Sugbu aron matuman ang ilang gipangayong usbaw sa suholan.

Ang mga labor groups kagahapon nga nagpahigayon og rally sama sa Kilusang Mayo Uno, (KMU), Bayan, Panaghugpong Kadamay, Kilusang Mag-uuma ng Pilipinas, Association of Concerned Teachers, Nadsu, Pamana Sugbu ug Anak Bayan.

Ang mga raliyista anha nanukad sa uptown area ug mipaingon sa downtown area diin gitapos nila ang rally atubangan sa usa ka dakong department store sa dalan Colon.

Wala hinuoy na-report nga kagubot tali sa kapolisan ug sa mga nagwelgang pundok, dunay gatusan ka mga polis gikan sa Cebu City Police Office ug Police Regional Office-7 ang gipakatap pagmentinar sa kahapsay ug kalinaw.

Sa pikas bahin, gisaway ni Badayos ang gipahigayong mga jobs fair sa mga lokal nga kagamhanan sa Sugbu kagahapong adlawa bisan paman libuan sa mga aplikante ang na-hire on the spot sa nagkadaiyang mga jobs fair nga gipahigayon sa nagkadaiyang dapit sa Sugbu

Alang kang Badayos, ang jobs fair usa lang ka ‘band-aid solution’ ug dili maoy tubag sa problema sa pamuo dinhi sa nasod.

“Kana man gong madawat sa jobs fair wala man gihapon nay kasiguruhan sa panarbaho, tag six months ra man na unya mawagtang ra pud,” sumala ni Badayos.

Samtang ang Bagong Alyansang Makabayan (Bayan) Central Visayas nagtoo nga panahon na nga usbon ang sistema sa panggobiyerno sa Pilipinas.

Ang chairman sa Bayan Central Visayas nga si Jaime Paglinawan miduso sa Sosyalismo nga giingong maoy bugtong solusyon sa giatubang karong problema sa nasod.

“Kay sa kapitalismo nga sistema, ang mga langyaw ra gyud nga mga kapitalista nga kasosyo sa atong nasod maoy nabulahan,” sumala ni Paglinawan.

Ubos sa sosyalismo nga sistema, panag-iyahon na sa gobyerno ilabi na ang estratihikong industriya sama sa lana, elektrisidad, transportasyon ug uban pa. - Rey Pasaporte uban sa report ni Elly Bolonos (BANAT NEWS)