Most Wanted Diay Ang Na-Entrap

CEBU, Philippines – Sakop sa kidnap for ransom gang ang manag-agaw nga nadakpan atol sa entrapment sa Provincial Intelligence Branch (PIB) didto sa barangay Pooc, dakbayan sa Talisay niadtong   sa Abril 20 ning tuiga.

Nasayran nga si Rogelio Oblinar ug ig-agaw niining si Andrew Oblinar   gikuha sa Provincial Intelligence Branch (PIB) uban sa mga kadagkuan sa Presidential Anti Crime Emergency Rescue (PACER) niadtong Mayo 30, naila diay sa pangalan nga si Felizardo Pagulayan,   taga Panabo City Davao del Norte nga usa diay sa PNP most wanted person ug may patong sa ulo nga P500 mil.

Si Pagulayan kinsa nagpaila nga si Rogelio Oblinar natanggong sa bilanggoan sa Maghaway, Talisay, human madakpi sa mga sakop sa PIB niadtong Abril 20 sa usa ka entrapment diha sa barangay Pooc gumikan sa pagpamaligya og peke nga kwarta.

Si Pagulayan nahimong wanted tungod sa kasong kidnapping niadtong Abril 21, 2002 ug nalutsan og warrant of arrest nga giisyu ni Judge Maria Nena Santos sa Regional Trial Court Branch 171 sa Valenzuela City.

Si   Insp. Nestor Acebuche sa PACER uban kang Insp. Wilfredo Pulvera, chief investigator sa PIB maoy mikuha kang Pagulayan didto sa bilanggoan sa Maghaway.

Si Pagulayan positibong gitudlo sa usa sa mga saksi sa kidnapping sa dihang gidala kini pagbalik sa buhatan sa PIB.

Ang kanhi hepe sa kapolisan sa lalawigan sa Sugbu Sr. Supt. Carmelo Valmoria kinsa tua na sa Camp Crame maoy miduso sa hulagway sa akusadong si Pagulayan didto sa PACER-Manila sa dihang nadakpan kining nagpailang si Rogelio Oblinar.

Sa dihang gisusi sa PACER, walay Oblinar nga adunay kaso apan sa dihang ang hulagway gitandi sa mga hulagway sa PNP Most Wanted Person nasutang si Pagulayan kini.

Ang mga kadagkuan sa PIB nagkanayon nga niadtong nadakpan nila sa entrapment si Pagulayan ila gilayong gipahibalo ang hepe sa CPPO nga si Valmoria gumikan kay mitukma ang hulagway niini sa talaan sa wanted sa PNP.

Gitinguha nilang ma-hold ang akusado ug ipasaka gilayon ang kasong swindling ingon man counterfeiting apan ang akusado wala usab kini maka-piyansa.

Ang akusado sa dihang nadakpan   mipahibalo nga usa siya ka kanhi sakop sa Philippine Constabulary apan nasuta sa kapolisan nga wala kini record sa kapolisan ug sa militar ug sa National Statistics Office. -Guam P. Logroño (BANAT NEWS)