Pagsul-ob og protective gear batok sa swine flu virus wala pabori

CEBU, Philippines – Dili pabor ang hepe sa Bureau of Quarantine sa Sugbo nga si Dr. Emmanuel Labella nga pasul-ubon og protective gear pangontra sa swine flu virus ang mga personnel sa Mactan-Cebu International Airport Authority (MCIAA).

Nabalaka si Labella nga makahatag lang unya kini og kabalaka sa tanang mga pasahero sa maong airport kun makitang nanagsul-ob og protective gears ang tanang mga personnel.

Apan giklaro ni Labella nga kun mao gyud kini kamanduan sa airport management sa ilang mga personnel dili usab sila makapugong niini.

Gisugyot hinuon ni Labella ang case to case basis lang nga paggamit sa maong mga protective gear aron dili usab kini makahatag og kabalaka sa publiko.

Sa pagkakaron wala pay bisan usa ka kaso sa swine flu virus nga nakasulod na dinhi sa nasud ilabina sa Sugbo ug ang gobiyerno nagkara-kara sa pagmuntar og mga proteksyon batok niini.

Matud ni Labella walay hunong ang ilang mga quarantine officers pagpakig-alayon sa mga airport officials aron estriktong mamonitor ang tanang mga pasahero nga moabot sa tugpahanan dinhi sa Sugbo ilabina kadtong gikan sa mga nasud sa Mexico ug Amerika.

Samtang ang kagamhanan sa dakbayan sa Sugbu magsugod na sa mga kampanya batok sa maong sakit human sa panagtigom nga gipatawag ni acting mayor Michael Rama sa gitawag na karon ug Q-Team (Quick-Response Team).

Ang pangulo sa Q-Team nga si Doctor Nestor Alonso miingon nga unahon niya ang pagpakigtagbo sa mga hospital administrators sa dakbayan aron pagsigurong andam na usab ang nagkadaiyang tambalanan pagdawat og mga pasyente kung maabot sa Sugbu ang swine flu.

“Kay sa ospital man gyud padung ang mga biktima, so, we will see to it nga ready na usab ang atong mga tambalanan, public o private,” sumala ni Alonso.

Human niini miingon ang labaw sa Q-Team, nga ang mga barangay kapitan na usab sa dakbayan maoy sunod niyang pakigtagboan aron sila makatabang pagsabwag sa kasayuran labot sa swine flu ug pag-alerto sa ilang mga health centers sa kabarangayan.

Ang kagamhanan sa dakbayan gikatakdang mopalit og mga kagamitan batok sa swine flu virus sama sa mga fluids, N-95 masks, ug uban pang mga gikinahanglan nga magamit sa katawhan paglikay sa nahisgutang makamatay nga sakit.

Human niini isunod dayon ang swine flu virus drill nga abagan usab sa Cebu City Disaster Coordinating Council (CCDCC) pinaagi sa information drive labot sa maong sakit. - Darrel Carumba uban sa report ni Elly Bolonos (BANAT NEWS)