Daghang titser moapil sa rally

CEBU, Philippines – Moapil usab sa rally protesta sa mga militante karong adlawa ang mga magtutudlo sa pampublikong mga tulunghaan aron manawagan sa gobiyerno nga usbawan na ang ilang suhulan.

Ang Teacher's Dignity Coalition-Central Visayas spokesperson nga si Fely Mangayao sa Florencio Urot Memorial National High School ug ang regional coordinator nga si Anabelle dela Cerna sa Carcar National High School nagkanayon nga ilang pangayuon ni Presidente Gloria Macapagal Arroyo ang P9 mil nga dugang sweldo sa mga public school teachers.

Sumala pa ni Mangayao nga napasar na sa Committee on Appropriations sa Ubos Balay Balaoranan ang Salary Standardization Law 3 nga gipangamahanan ni House Speaker Prospero Nograles nga nag-amendar sa   karaang Salary Standardization Law.

Kini ang paghatag og dugang sweldo sa tanang mga kawani ug opisyales sa gobiyerno gikan sa 40 porsiyento   para sa salary grade 6 ngadto na sa 138 porsiyento alang sa mga opisyales nga nagranggo og undersecretary.

Apan gitataw ni Mangayao ug Dela Cerna nga wala sila makauyon niini tungod kay 54 porsiyento lamang ang increase sa mga magtutudlo ilabi na sa mayoriya nga mga Teacher 1 ug tagitagihon pa kini sa paghatag sulod sa upat ka tuig.

Matud pa niini nga ang 6,523 nga increase kun bahinon kaupat P1, 630 ra ang ilang madawat. Dugang pa sa mga magtutudlo, daghan nang gipasar ug gihisgutang mga balaudnon nga naglambigit sa salary increase sa mga magtutudlo sukad pa niadtong 1991 apan bisan usa walay napatuman niini.

Gitataw usab niini nga ang suhulan sa mga magtutudlo sa public schools anaa lamang sa salary grade 10 nga sama ra sa kawani sa gobiyernong migraduwar lang og high school.

Sila si Mangayao ug Dela Cerna miingon nga ilang gipangayo nga isaka ang salary grade sa mga magtutudlo gikan sa salary grade 10 ngadto sa salary grade 17 nga tukma lang sa mga gradwado sa kolehiyo.

Ang ilang grupo anha mag-rally protesta uban sa Sanlakas atubangan sa Kapitolyo karong adlawa atol sa kasaulogan sa adlaw sa mga mamumuo kon Labor day. - Chester Abadilla uban sa report ni Lesley Caminade (BANAT NEWS)