CEBU, Philippines – Kapolisan sa syudad sa Sugbo andam na sa Labor Day karon apan higpit nga ipatuman ang maximum tolerance ngadto sa mga raliyista basta dili lang sila mangguba og kabtangan.
Si Cebu City Police Director Patrocinio Comendador, atol sa Talakayan sa Isyung Polis niadtong Miyerkules nagkanayon nga lakip sa ilang bantayan mao ang Malacañang sa Sugbo sa may Plaza Independencia ug sa downtown area sa Colon area diin kasagaran himuon ang mga rally.
Dugang pa ni Comendador nga duha ka-teams ang iyang ipakatap kini mao ang mobantay sa kahapsay sa trapiko ug ang Crowd Dispersal Unit lakip na ang mga sakop gikan sa Police Regional Office-7.
Samtang aduna usab ibutang nga beat patrol nga nagsige og roving sa syudad sa Sugbu aron pagsusi unya kung dunay mosagol nga mga walhong pundok ug mohimo og kasamok sa malinawong rally.
Mihangyo si Comendador sa katawhan ilabi na sa mangapil sa rally nga sundon ang balaod aron walay kagubot ug di magkasakitay atol sa ilang kalihukan.
Samtang ang OIC sa Provincial Police Office, Supt. Erson Digal nagkanayon nga dunay duha ka platoon nga iyang giandam isip suporta sa mga kapolisan sa nagkalain-laing syudad sama sa Lapu-lapu, Mandaue ug Cebu.
Ang tigpamaba sa Philippine Drug Enforcement Agency nga si Jessie Tabanao nagkanayon nga aduna usab silay gi-andam nga bomb sniffing dogs nga ipakatap abag sa kapolisan. - Lesley Caminade (BANAT NEWS)