Swine flu wa molurang

CEBU, Philippines – Wala pay nasinating ‘panic buying’ sa mga tambal kontra ‘swine flu virus’ sumala pa sa mga botika sa dakbayan sa Sugbu sumala pa sa report sa ABS-CBN Central Visayas.

Ang mga botika mitug-an nga wala pay mga tawong namalit niini kanila bisan paman sa pagkatap na sa balita kabahin sa maong sakit apan ang Department of Health mipasidaan nga di angayang mamalit niini kung wala kinahanglana.

Samtang ang DOH mipadayag nga abunda ang stocks sa ilang tambal kontra sa maong sakit lakip na ang gamiton sa mga hospital staff kun duna may mataptan niini sa matag lugar.

Sa laing bahin, giisa na ngadto sa Phase 5 ang alarma sa World Health Organization kabahin sa pagkatap sa makamatay nga virus nga “swine flu” nga dako na gyud ang kahigayunan nga matawag na kining ‘pandemic’ sumala pa sa report.

Nakita sa WHO nga mikatag na sa Estados Unidos ang maong sakit tungod kay duna nay namatay sa maong nasud nga usa ka 22 ka buwan nga bata. Mao na kini ang ikaduhang nasud nga dunay na-report nga namatay sa maong sakit sunod sa nasud sa Mexico.

Mimando ang kadagkuan sa Mexico nga pasirad-an ang tanang publikong mga kan-anan ug mga public spaces aron dili na mokatag ang nahisgutang virus.

Gihulagway sa maong nasud nga makaapekto gyud kini sa ilang nagtinga na usab karong ekonomiya ug mibana-banang moabot sa 70 bilyones dolyares ang mamugnang danyos niini. Si US President Barack Obama sa iyang bahin mipadayag nga buhaton nila ang tanan aron masumpo ang maong sakit apan midumili kini sa pagsunod sa panawagang pasirad-an na ang ilang utlanan sa Mexico.

Sa bag-ong talaan sa WHO duna nay 91 ka mga tawo ang nataptan sa maong sakit sa US ug usa ang namatay; 26 sa Mexico diin pito ang namatay; sa Canada 31 ang na sakit, upat sa Spain, tulo sa New Zealand , tulo sa Germany, lima sa Britain, duha sa Israel ug usa sa Austria.

Samtang sa nasud sa Egypt gimandoan ang tanang dunay binuhing baboy sa pagpatay niini aron malikayan ang pagkatag sa nahisgutang virus sa ilang lugar.

Ang assistant director general sa Keiji Fukuda sa WHO nagkanayon nga sa pagkakaron wala pa mopakita og senyales nga mihinay na ang pagkatap sa maong virus sanglit mas misamot hinuon kini. – BANAT NEWS