Laing 2 ka tawo giingong apil sa OFW-murder

CEBU, Philippines – Gawas sa duha ka magsuong maoy gidudahang mipatay ug milubong sa usa ka 60-anyos nga OFW luyo sa iyang balay diha sa sitio Litmon barangay Poblacion gisusi sa Kapolisan ang report nga duna pay laing duha ka mga tawong kauban ang duha sa paghimo sa maong krimen.

Si Supt. Henry Biñas, hepe sa Talisay City Police Station sa pakighinabi niini sa Banat News nagkanayon nga nakadawat sila og impormasyong ang laing duha ka tawo gikatahong mitabang sa paglubong sa patay’ng lawas ni Teresita De Guzman.

Si De Guzman kapuyo sa usa sa mga suspek nga si Raymundo Barangan nga gikaingong ulahing nadunggang nakig-away sa biktima pipila ka adlaw una pa ma-missing ang babaye.

Gawas kang Barangan gipangita usab ang igsuon niining si Tata kinsa mipusil sa kapolisan nianang adlaw pagkadiskubre sa gilubngan sa biktima luyo sa balay sa naulahi.

Milanat pa og duha ka semana una pa madiskubrehi sa kapolisan nga gilubong ra sa luyo ang patay’ng lawas ni De Guzman nga sumala pa sa medico legal officer sa PNP Crime Laboratory nga nabalian kini og liog.

Giklaro usab ni Biñas nga wala pa nila hingpit mapasaka ang kaso batok sa magsuong Barangan tungod kay nanguha pa sila og dugang mga testimonya sa mga silingan sa biktima apan gipaniguro niining karong adlawa matapos nila kini.

Sa maong mga testigos gikatahong walay bisan usa nga silingan sa biktima nga mitabang aron mahitsas ang kaso sanglit gituohang nahadlok sila sa mga suspek nga mao unya’y balikan. Niadtong Miyerkules ang patay’ng lawas ni de Guzman ang gilubong na sa iyang mga paryente sa tarong nga lubnganan. - Brenda Batuto (BANAT NEWS)