Mga polis andam modakop kang Dumpit

CEBU, Philippines – Andam ang kapolisan sa dakbayan sa Sugbu pagdakop sa ilang kaubang polis nga si SPO1 Adonis Dumpit kinsa gipasakaan na’g kasong murder sa Ombudsman for the Military human mapatay niini ang gipasanginlang tulisan nga si Ronron Go niadtong Disyembre 14, 2004.

Kini maoy giklaro ni Sr. Supt. Patrocinio Comendador, direktor sa kapolisan sa dakbayan sa Sugbu atol sa iyang pag-atubang sa mga sakop sa media sa gipahigayong Talakayan sa Isyung Police.

Si Comendador mipadayag nga sa pagkakaron wala pa sila makadawat og warrant of arrest gikan sa korte batok kang SPO1 Dumpit apan kun malutsan man gani andam sila sa pag-implimentar.

Giklaro niini nga ang Cebu City Police Office pabiling nagpaluyo ni Dumpit sa giatubang niining kaso ug ilang tabangan kutob sa ilang mahimo. Gawas niini, ang kagamhanan sa dakbayan sa Sugbo mohatag usab sa legal support.

Sumala pa ni Comendador nga sa pagkakaron pabilin pang aktibo si Dumpit sa iyang trabaho diha sa CCPO samtang magpadayon ang kaso.

Apan ang nahitabo kang SPO1 Dumpit dili kini maka-demoralize sa ilang mga sakop sa CCPO sa pagpadayon sa ilang trabaho sa pagpatunhay sa kahapsay ug kalinaw.

Gipasabot niini nga dili na bag-o ang maong problema ug kabahin na kini sa trabaho sa pagpamolis nga makasugat gyud og kaso sa ilang pagpatuman sa ilang trabaho sukad sila manumpa sa pagka-polis.

Si SPO1 Dumpit nga gikahinabi sa dySS sa Super Radio, mipadayag nga andam siya sa pag-surrender kun ugaling malutsan og warrant of arrest sa maong kaso.

Matud pa niini usa ka legitimate operation ang nahitabo ug walay lipot ingon man intention sa pagpatay kang Go sa dihang iyang napusilan kun dili kabahin lang kini sa iyang trabaho.

Nasayran nga si PO1 Dumpit ug mga kaubang polis nga sila si PO3 Ruel Hortellano ug PO3 Porferio Gabuya mitubag sa alarma nga pagpanulis sa Sitio Sampaguita, barangay Villagonzalo ll. - Guam P. Logroño (BANAT NEWS)