Basurero mawad-a'g panginabuhi-an

CEBU, Philippines – Mokabat sa 107 ka pamilya sa dumping site sa barangay Umapad sa dakbayan sa Mandaue gibati og kabalaka nga mawad-an sa ilang panginabuhi kun ipatuman ang pagtak-op niini.

Kini subay usab sa Republic Act 9003 kon Solid Waste Management Act of 2001 nga higpit na nga nagdili sa open dumping area kon bukas nga basurahan. Si Mayor Jonas Cortes nga nahinabi sa Banat News kagahapon miangkon sa mga kalapasan nga nahimo sa pagpadayon og labay sa mga basura sa barangay Umapad sa maong dakbayan.

Kini ang hinungdan nga gibalhin ang iyang buhatan ngadto sa maong lugar sa tinguha nga mabantayan niya pag-ayo ang kahapsay sa maong dapit ug kalikayan ang mga masinating mga kadaut nga mao unya ang mahimong hinungdan sa pagtak-op niini.

Gipasabot niya nga ang maong suliran sa paglabay sa mga basura mahimo lamang kahatagan og kasulbaran kun hingpit nga kahatagan og katumanan ang giplanong clustering alang sa paglabay sa mga basura sa kalungsoran ug mga dakbayan.

Matud pa ni Cortes nga higpit karong gibantayan sa Department of Energy and Natural Resources (DENR) 7 ang ilegal nga paglabay og basura sa maong lugar .

Tungod niini ipatuman usab niya ang pagtukod sa Materials Recovery Facilities (MRF) nga maoy labayan sa madugta ug dili madunot nga matang sa mga basura. – BANAT NEWS