CEBU, Philippines – Hatagan sa kagamhanan sa dakbayan sa Sugbu og financial assistance ang mga biktima sa nahulog nga mini-bus diha sa barangay Busay niadtong miaging semana.
P10 mil ang gisugyot ni konsehal Gerardo Carillo nga ihinabang sa siyudad alang sa pamilya sa nakalas sa maong insidente nga sila si Jessan Gabisay ug Margie Mabini.
Samtang P5 mil usab alang sa mga nangaangol ug nalandig sa nagkadaiyang tambalanan sa dakbayan human sa insidente.
Nasayran nga sa kapin sa 40 ka mga sakay sa mini-bus nga mulopyo sa barangay Babag, 24 niini ang na-admit sa mga tambalanan gawas sa duha nga nakalas.
Gipaabot hinoon nga niining semanaha makagawas na sa ospital ang nahabiling lima ka mga biktima nga naglakip sa driver nga si Rufino Secretaria.
Sa iyang bahin, gihangop ni Babag barangay captain Rita Sabal ang gihimong lakang sa kagamhanan sa dakbayan.
Kini tungod kay matud ni kapitan Sabal, walay matunol nga hinabang pinansyal ang ilang barangay ngadto sa ubay-ubay nga mga biktima. Gipadayag hinuon sa kapitan nga ilang suportahan ang mga biktima ilabi na sa pagkuha niini og mga dokumento sa barangay. - Elly Bolonos (BANAT NEWS)