Agent gitulis ug gihuboan

CEBU, Philippines – Usa ka call center agent gitulis ug gihubo-an pa gyud og senina sa upat ka wala hiilhing hold-upper kinsa mition kaniya og kutsilyo didto sa dalan Laurente, Capitol site, ning dakbayan sa Sugbo pasado alas 4 kagahapon sa buntag.

Ang biktima mao si Leoncio Nuedas Jr., 20, usa ka call center agent sa Global Cebu ug kasamtangang nagpuyo sa Pagsabungan, syudad sa Mandaue, ug lumad nga taga Sampaloc, Metro Manila .

Ang nakuha sa mga hold-upper gikan sa biktima mao ang usa ka cellphone, relo de pulso, T-shirt, ug cash nga P2 mil.

Ang nagtibi ug wala nay senina nga biktima nagkanayon nga naglakaw siya sa nahisgutang lugar dihang kalit lang siya nga giduol sa upat ka wala mailhing lalaki ug mition kaniya og kutsilyo uban sa pagdeklarar nga hold-up. Tungod sa kahadlok sa biktima gihatag nalang niya ang tanang mga butang nga nahisgotan na. Sa pagkakaron padayon pang gipangita sa kapolisan ang mga tulisan. - Lesley Caminade (BANAT NEWS)