Kawata'g hiniktan dakpan

CEBU, Philippines – Nagtingkagol sa prisohan ang usa ka tawo dihang nadakpan kini nga nangawat og hiniktang manok nga igtatari didto sa barangay Tejero sa miaging gabii.

Ang suspek nailhan nga si Michael Auso, 31, nga taga Tejero, ug ang hiniktang manok nga iyang gikawat nga balor og P15 mil gipanag-iya usab ni Benjamin Sun Jr. nga iyang silingan.

Matud pa ni PO2 Felizardo Callego sa Waterfront Police Station nga nasakpan ang suspek nga mikatkat sa koral sa balay sa tag-iya sa hiniktan pinaagi sa security guard nga si Allan Rosindo.

Gumikan kay nanawag nang daan si Rosindo og polis, giatangan nalang nila nga mogawas sa pultahan sa koral ang suspek ug didto nasipong dayon nila kini nga nagdala og usa ka hiniktan ug gisakmit usab nila ang usa ka .38 kalibreng revolver nga walay lisensya nga gitangkil niini. - Lesley Caminade (BANAT NEWS)