Aksidenteng napusilan kritikal

CEBU, Philippines – Kritikal ang kahimtang sa usa ka 19 anyos nga lalaki dihang aksidenti kining napusilan sa iyang barkada kinsa gisungog niya nga dili mobuto ang armas niini didto sa Poblacion, lungsod sa Medillen niadtong Lunes sa alas 12:45 sa udto.

Ang biktima mao si Philip Jun Lobetaña Velasco, 19, ulitawo, nga taga Sitio Baybay, Poblacion, Medillen, samtang ang suspek mao usab si Janmela Tumabini Pacilan, 25, ulitawo, silingan ug suod nga barkada sa biktima.

Si PO3 Paquito Soon sa Medillen Police Station mibutyag sa Banat News nga ang suspek sa sayo pa nagpakita-kita sa iyang snubnose nga .38 kalibreng revolber ngadto sa biktima.Apan matud pa, napikon ang suspek dihang gisungog sa biktima nga dili mobuto ang iyang armas de fuego.

Tungod kay gisapot, gi-komedyahan dayon sa suspek pagtion ang bagolbagol sa biktima ug dihang gikablit ang gatilyo niini, aksidenting mibuto ang maong armas ug maayong pagkaigo sa biktima. - Darrel A. Carumba (BANAT NEWS)