Di ka-'file' og SAL silotan
CEBU, Philippines – Ang Department of Interior and Local Government (DILG) mipahinumdom sa mga opisyal sa kabarangayan sa dakbayan sa Sugbu nga moduso na sa ilang Statement of Assets and Liabilities (SAL) ug ang mapakyas niini pagasilotan.
Kini tungod kay ugma nang adlawa ang gitakdang deadline sa pagsumiter sa SAL unya sa may 19 ka mga opisyal sa barangay sa nagkalainlaing dapit ning dakbayan ang wala pa makatunol sa ilang SAL hangtod kagahapon sa hapon.
Kini mao ang mga opisyal sa barangay Agsungot, Babag, Binaliw, Capitol Site, Kalunasan, Malubog, Mambaling, Pamutan, Pit-os, Pasil, Sambag 1 ug Sambag II.
San Nicolas Proper, Sapangdaku, Sirao, Santa Cruz, T. Padilla, Tabunan, ug barangay Tisa.
Matud ni City DILG Director Patricio Gabuya nga mag-atubang unya og problema ang mga opisyal sa barangay kun mapakyas kini pagduso sa ilang SAL sa gihatag nga deadline.
Miingon si Gabuya nga ang Ombudsman maoy mopatuman og silot kutob niadtong mapakyas sa pagtuman ning maong balaod, pinasubay sa nalatid sa RA 6713 nga magsuspenso, disqualify, mopamulta, o kaha magpabilanggo. – BANAT NEWS
- Latest
- Trending
