Lampposts overpriced gyud - Ombudsman

CEBU, Philippines – Nahuman na ang reinvestigation nga gipahigayon sa Ombudsman labot sa kontrobersiyal nga overpriced nga decorative lamppost sa 12th Asean Summit ug giingong gipaburot gyud ang mga presyo niini. Sumala pa ni assistant deputy Ombudsman for the Visayas Virginia Palanca-Santiago nga nakompleto ug may resulta na sa ilang reinvestigation sa decorative lamp post nga gimando sa Sandiganbayan base usab sa gusto sa Ombudsman aron malakip ang report sa Commission on Audit kon COA.

 Apan mitumbok si Santiago nga ang Ombudsman Visayas dili una makahatag og kopya sa resulta sa imbestigasyon ngadto sa mga sakop sa media tungod kay ihatud pa kini nila ngadto sa buhatan ni Ombudsman Merceditas Gutierrez.

 Gipasabot ni Santiago nga makumpleto lamang ang ilang findings sa higayon nga mapirmahan ni Ombudsman Gutierrez ang ilang finding sa reinvestigation.

 Si Santiago miklaro nga base sa ilang pagsusi-susi overpriced gyud ang maong decorative lamppost ug may tulobagon gyud ang mga nalambigit nga opisyales sa dakbayan sa Mandaue, Lapu-lapu ug DPWH-7.

 Ang maong reinvestigation maoy magbukas pagbalik sa kasong kalapasan sa anti graft and practices act ngadto sa Sandigabanbayan batok kang kanhi Mandaue City Mayor Thadeo Ouano uban ang mga opisyales sa Mandaue city, Mayor Arturo Radaza sa dakbayan sa Lapulapu ug mga kaubanan ug ingon man ang mga opisyales sa DPWH-7 nga gipangulohan ni kanhi regional director Roberto Lala. - Chester Abadilla (BANAT NEWS)