Magsuon naigo sa .9mm ni anhing Dick

CEBU, Philippines – Naigo ang duha ka magsuon sa usa ka bala sa .9mm nga pistola nga mibuto samtang gilimpyuhan sa igsuon didto sa Wonderland Shooting Range sa barangay Agus dakbayan sa Lapulapu sa milabay'ng hapon.

Ang biktima mao sila si Joel Amaya, 36, minyo ug ang manghod niini nga si Andonie Amaya, 29, minyo, pulos mga residente sa Sitio Agus Dako barangay Agus, dakbayan sa Lapulapu ug mga utility worker sa maong shooting range.

Base sa pasiunang imbestigasyon ni SPO1 Frederick Eslit ug PO1 Diosdado Iran sa Crime Against Person sa kapolisan sa Lapulapu nasuta nga disgrasya ang nahitabo sa duha ka managsuon sa dihang gisugo kini ni Richard Sison Jr. (anak ni anhing Atty. Richard “Dick” Sison) nga limpiyohan ang armas nga gigamit niini sa firing.

Matud pa ni Andonie nga sa dihang iyang gilimpiyohan ang maong armas gahi ang gatilyo ug miungot ang chamber niini hinungdan nga iyang gidismantol ang maong armas.

Nakugang na lang si Andonie sa dihang kalit nga mibuto ang maong armas ug naigo ang walang palad niini ug milahos ang bala ngadto sa iyang igsuon nga naglingkod sa iyang tungod ug naigo sa tuong ilok. Gidala ang magsuon ngadto sa Mactan Doctor’s Hospital.

Sa dugang imbestigasyon sa kapolisan nasuta nga ang maong armas anaa pa kini sa ngalan ni anhing Atty. Richard   Sison   ug gigamit sa iyang anak.

Si Atty. Sison namatay human gibanhigan sa dalan Sotto ning dakbayan niadtong miaging tuig.

Hinuon ang batan-ong Sison mipasalig   nga moabaga sa tambalanan samtang gitun-an pa sa kapolisan kun unsay mahimong kalapasan ni Sison sa maong hitabo. - Bong Soriano (BANAT NEWS)