Nagwara-wara'g sundang gipatay

CEBU, Philippines - Patay diha-diha ang usa ka lalaking giingong kalit nga nanigbas sulod sa diskohan samtang duha sa iyang mga biktima ang samdan sa sitio Lower barangay Manlapay lungsod sa Dalaguete sa miaging gabii.

Ang namatay giilang si Donald Amancio samtang ang samdan usab sila Joselito Albiso,25 ug Ernesto Llena,18 pulos molupyo sa barangay Canbantog lungsod sa Argao kinsa maoy giwara-warahan ni Amancio og sundang.

Wala pa matino sa kapolisan kung si kinsa ang wala mailhing tawong maoy giingong mipusil kang Amancio.

Sa imbestigasyon sa kapolisan nasayran nga   samtang nagkalingaw ang mga tawo sa diskohan kalit lang nga miwara-wara og sundang si Amancio uban ang igsuong si Randy ug gipanigbas sila si Llena ug Albiso sa walay igong rason.

Ang duruha naigo sa ilang mga bukton ug kamot hinungdan nga nagkatibulaag sila og dagan, apan diha-diha nakadungog nalang sila og sunodsunod nga buto sa armas.

Sa ilang pagsusi og balik, nagbuy-od na si Amancio nga napuno og samad pinusilan sa lawas apan walay tawong nakakita kung si kinsa ang mihimo niini.

 Samtang sa laing bahin, usa ka lalaki ang nasamdan gihapon sa usa ka disko sa barangay Masaba sa dakbayan sa Danao.

Ang napusilan sa buko-buko mao si Jerry Hermosilla Roble,28, residente sa maong dakbayan samtang nagkalingaw og sayaw uban sa iyang mga higala, wala pa usab mailhi ang suspetsado.

Matud pa sa kapolisan gikan pa sa gawas ang suspetsado ug kalit nga misulod dayong pusil sa biktima ug nagdali usab nga miikyas dungan sa nagkatibulaag nga mga tawo. Ang biktima gidala sa Danao District Hospital. -  BANAT NEWS