Ilegal nga drugas napuhag na

CEBU, Philippines - Wala na makaabot og 10 ka barangay ang gihugpaan sa illegal nga drugas dinhi sa dakbayan sa Sugbo sumala pa ni Dangerous Drugs Board Undersecretary (DDB)Atty. Clarence Paul Oaminal kagahapon.

Si Usec. Oaminal mibutyag sa Banat News nga mao kini nahimutang karon sa bag-o nilang talaan nga nagpakita nga may epekto gyud ang paningkamot sa DDB sa pagsumpo sa ginadiling drugas dinhi sa lalawigan.

Usa sa mga hinungdan niini mao ang subsob nga paningkamot sa mga opisyal sa kabarangayan sa kampanya batok sa ilegal nga drugas.

Hinuon giklaro ni Usec Oaminal nga ang DDB mitutok pa gihapon karon sa pipila ka sitio sa mga barangay Ermita, Pasil, Duljo-Fatima, Labangon ug Calamba.

Midugang siya nga dili pa gyud hingpit nga matawag nga illegal drug free ang 83 ka barangay sa dakbayan sa Sugbu tungod kay sa mga hilit nga barangay niini, aduna na gayo'y nakasulod nga mga shabu.

Nunot niini padayon karon ang ilang pagpakig-alayon sa mga local nga opisyal pinaagi sa pagpahigayon og mga seminar kalabot sa pag-alkontra sa mga tawong nalambigit sa illegal nga drugas. -  BANAT NEWS