Mister nagbitay naabtan ni Misis

CEBU, Philippines - Nagbitay nang naabtan sa asawa ang iyang bana   sulod sa pasungan sa ilang binuhing kanding pasado alas 9   sa miaging gabii sa barangay Cambuhai lungsod sa Balamban.

Ang naghikog nailhan nga si Avelino Alaigato Marcellano, Sr., 40, usa ka tighimo og hallowblock sa barangay Bondol sa nahisgutang lungsod.

Matud pa sa asawa sa biktima nga si Basilisa sa dihang giimbestigar sa kapolisan nga niuli ang iyang bana sa ilang panimalay nga perting huboga apan ang iyang gikatingala nga imbes mupahuway migawas na hinuon kini.

Pila ka oras ang milabay wala na mibalik ang iyang bana hinungdan nga iya kining gisundan ug sa pag-agi niya sa ilang pasungan sa kanding nakugang na lang siyang nakakita nagbitay na   ginamit ang usa ka pisi. Iya unta kini nga gisuwayan nga pagtabang apan wala na kini kinabuhi.

Base sa pakisusi sa kapolisan sa lawas sa biktima wala kini nakitang mga samad nga magpamatuod nga kini adunay foul play samtang ang asawa naglibog sa pagkakarun kun unsa gyu'y hinungdan nga naghikog ang iyang bana.

Sa laing bahin patay usab ang usa ka lalaki human kini natabonan sa iyang gikubkob nga anapog sa Sitio Cambatti, barangay Corazon, lungsod sa Catmon pasado alas 12 sa udto sa miaging adlaw.

Ang mangubkobay nailhan nga si Sofriano Densing, 62, sa Pangngatan, Sogod.

Sa imbestigasyon sa kapolisan nasayran nga sa dihang nangubkob ang biktima sa nahisgutang lugar kalit lang nga midagayday ang yuta nga iyang gikubkoban diin miresulta sa pagdahili ngadto sa iyang nahimutangan.

Dugang pa niini nga natabonan ang maong biktima diin naapil og tabon ngadto kaniya ang mga lubi nga naa sa iyang palibot. - BANAT NEWS