Gipaninglan sa bangko bisag way utang

CEBU, Philippines - Usa ka jeepney drayber nga taga barangay Malolos lungsod sa Barili ang gibati og tumang kabalaka ug kahadlok nga ma-priso human makadawat og demand letter nga pabayron og P55 mil nga giingong iyang giutang sa usa sa mga naniradong bangko nga sakop sa Legacy Group of Companies dinhi sa Sugbo.

Ang maong drayber nga si Allien Joseph Villarin sa pakighinabi sa Banat News nagkanayon nga wala sukad-sukad siya mangutang sa maong bangko.

Si Villarin, taga Malolos Barili apan nagpuyo na dinhi ug nanginabuhi pinaagi sa pagpamasahero midangop sa media aron magpatabang kabahin sa demand letter gikan sa Philippine Deposit Insurance Corporation (PDIC) niadtong Huwebes sa buntag.

Ang PDIC gikatahong mimandong pabayran kaniya ang iyang utang nga P55 mil gikan sa naniradong Bank of East Asia (Banco Rural de Bisayas-Minglanilla Branch) bisan og wala siya makahulam og kwarta sa maong bangko.

Matud pa ni Villarin sa Banat News nga gisusi na niya ang maong bangko apan sirado na kini, ang gwardiya sa maong bangko mitug-an kaniyang siya na maoy ika-unom nga tawo nianang adlawa nga mireklamong nakadawat og demand letters ug pabayron sad sa ilang utang, pulos usab sila mihimakak nga nakautang sila sa maong bangko.

Ang demand letter sa PDIC nga penetsahan og Enero 30 pirmado sa Deputy Receiver sa PDIC nga si Atty. Josette Sonia Marcilla ug nagmandong pabayran na kaniya ang iyang giutang sulod sa napulo ka adlaw.

Ang chief executive officer sa PDIC nga si Anorasa Biray dihang gitawgan sa Banat News sa telepono mibutyag nga ang pangalan ni Villarin apil sa mga list of borrowers nga gisumiter kanila sa maong bangko dihang mi-takeover sila niini niadtong petsa 12 sa Disyembre sa nilabay'ng tuig.

Giawhag nila si Villarin ug ang uban pang mga tawong napadad-an og demand letter ug naa sa susamang sitwasyon pagduso sa ilang ensaktong tubag nga pagmatuod nga wala gyud sila makahuwam og kwarta sa maong naniradong bangko.

Si Villarin nagtuong gibinuangan siya sa manager (ngan gipugngan sa Banat News) sa maong bangko nga nanirado nga ilaha ra usab nga silingan sa Barili nga sumala pa niya nagtago-tago na karon human sa bulilyaso sa maong bangko.

Nagplano si Villarin nga mopasaka og kaso batok sa maong manager tungod sa pag-apil kaniya sa mga lista sa utangan sa maong bangko bisan og wala sila'y transaksiyon niini. - BANAT NEWS