CEBU, Philippines - Usa ka batan-ong nagpaabot sa iyang uyab ang namatay human gihansakan og kutsilyo sa dughan sa usa ka lalaki sa miaging gabii dinhi sa dakbayan.
Ang patay giilang si Christopher Piala Ragasajo,26, taga sitio Panaghiusa sa barangay San Nicolas human dunggaba sa usa ka giilang Iman Fantonial, taga sitio Ipil sa mao gihapong barangay.
Base sa imbestigasyon sa kapolisan nasayran nga ang biktima nagpaabot sa iyang uyab nga tua sa sulod sa diskohan dihang kalit nga gihansakan og 10 pulgadas nga kutsilyo ang iyang dughan.
Ang suspek dali dayong miikyas human sa pagdunggab kang Ragasajo ug padayon pang gipangita sa kapolisan.
Ang biktima gidala sa Cebu City Medical Center apan pila ka minuto ang milabay nakabsan kini sa iyang kinabuhi samtang gisubay na sa kapolisan kung unsay hinungdan sa pagdunggab kaniya. - BANAT NEWS