Hulga gisusi

CEBU, Philippines – Gitun-an na sa kapulisan sa lalawigan sa Sugbu ang hangyo ni Madridejos Vice Mayor Doroteo Salazar paghatag kaniya og police escort human kini gikatahong nakadawat og pagpanghulga sa kinabuhi.

Ang outgoing nga director sa kapulisan sa lalawigan sa Sugbu Sr. Supt. Carmelo Valmoria, nagkanayon nga ila pang gi-assess ang request ni Salazar.

Giangkon ni Valmoria nga dili madali-dali ang paghatag og police escort ngadto sa usa ka politiko kung di pa nila maklaro kun ang hulga tinuod ba kini o dili.

Sa pagkakaron si Valmoria nagkanayon samtang gihimo pa ang pakisusi sa maong hulga butangan una og mga polis ang munisipyo sa maong lungsod ilabi na panahon nga dunay sesyon ang konseho niini sa matag adlaw’ng Lunes.

Si Valmoria nagkanayon giingong supporters ni Mayor Salvador De la Fuente ang gidudahang nanghulga kang Salazar. Ang mayor ug si Salazar giingong di maayo ang relasyon sa usa’g-usa.

Nasayran nga duha ka polis ang gi-request ni Salazar diha sa buhatan ni Valmoria nga kuhaong close-in security human makadawat og suwat pagpanghulga niadtong mga milabay’ng semana. - Guam Logroño (BANAT NEWS)