'Killer' sa engineer nanghulga sad

CEBU, Philippines – Nagpailang mamumuno sa gipatay nga si Engineer Maliquias Ceballo kapin usa ka semana na ang nakalabay sa barangay Pitogo lungsod sa Consolacion giingong nanghulga’g usa ka negosyante nga taga Norte sa lalawigan sa Sugbu.

Si PO1 Ricky Linawagan sa Carmen Police Station sa interbyu sa Banat News nagkanayon nga usa ka Edward Tiu, 52, taga barangay Luyang sa nahisgutang lungsod ug sinaligan sa negosyo sa igsoon niining tag-iya sa Rough Riders Bus company maoy giingong gihulga sa wala magpailang tawo niadtong gabii sa petsa 20 ning buwana.

Ang maong tawo gikatahong miingon kang Tiu og: “manion ka anang driver sa “Germania” kang Negro? Bantay ka lang sulongon tika,” matud pa sa maong tawo base sa reklamo ni Tiu diha sa police blotter.

Dugang pang Tiu nga nahadlok siya sa hulga dihang ang maong tawo gikatahong mipasidaan kaniya kung gusto ba niyang parehason sa ilang “gitrabaho” nga si Engineer Maliquias Ceballo.

Usa ka Oscar Declanan alyas Negro nga taga barangay Alang-alang dakbayan sa Mandaue ang gipasanginlan ni Tiu nga mao ang tawong mihulga kaniya, si Declanan kanhi driver sa maong bus company nga gitaktak kaniadto.

Apan kagahapon, si Declanan nga giimbitar sa kapolisan hugot nga mihimakak nga nanghulga siya kang Tiu tungod kay iyaha kining agalon kaniadto.

Si PO1 Linawagan nagkanayon nga desidido si Tiu nga kasuhan og grave threats si Declanan bisan paman sa panghimakak niini.

Si SPO1 Silas Ceballo nga girelibuhan na pagka-hepe sa traffic division sa kapolisan sa Compostela ug naa na sa Provincial Security Group mibutyag sa Banat News nga iyahang higala si Tiu ug mipahibalo kini kaniya labot sa pagpanghulga ug sa pag-angkon sa maong tawo sa kalambigitan sa pagpatay kang Engr. Ceballo nga maguwang sa maong polis.

Human masayod niini, si Ceballo ug Tiu gikatahong miadto sa Consolacion police station aron ipasusi ang maong pangangkon sa tawong mihulga kang Tiu sa pagtuong makatabang kini sa imbestigasyon.

Gihulagway niining seryoso ang maong pagpanghulga ilabi na nga naghisgut sa gipatay niyang igsuon. – BANAT NEWS