Kiha sa Kapitolyo sa siyudad moabot ra - Garcia

CEBU, Philippines – Si Kongresista Pablo John Garcia sa ikatulong distrito sa lalawigan sa Sugbu miingon nga di angayang mabalaka si Mayor on leave Tomas Osmeña kabahin sa pagsang-at nila og kaso sa korte nga nag-kwestyon sa joint venture agreement tali sa kagamhanan sa siyudad ug sa Filinvest Land Incorporated (FLI) nga naglambigit sa 50.6 hektaryang luna sa South Road Property (SRP).

Si Osmeña kinsa tua pa sa Houston, Texas nagpaalim sa gioperahang pantog mipadayag sa kaandam sa dakbayan pag-atubang sa inquiry apan mihulagway niining walay makab-ot nga solusyon sa maong paagi ug ang mahitabo mao lang unya ang pagpasikatay sa mga politiko.

“Mayor Osmeña need not worry. Given the brazenness of this anomalous joint venture agreement, we will come to that (filing of cases in court), eventually,” matud pa sa reaksyon ni Garcia sa pamahayag sa mayor nga mihagit sa Kapitolyo pagdangop sa korte imbes nga mopahigayon og congressional inquiry kun duna kini pagduda sa maong transaksyon.

Ang Kongresista kinsa mi-deliver sa iyang privilege speech sa Ubos Balay Balaoranan miingon nga isip magbabalaod iyang trabaho ang pagpanalipod sa interes sa mga magbubuhis.

Apil na niini ang pagpanginlabot kun dunay ibaligyang reclaimed lands sa mga LGU ngadto sa mga pribadong sektor.

Gihulagway ni Garcia ang giluwatang pamahayag sa mayor nga “cocky and irresponsible” kabahin sa paghulagway sa mayor nga ‘hadlok’ ang Kapitolyo nga mosang-at og kaso kay basin nabalakang di mopabor ang mga huwes sa Kapitolyo.

Gumikan sa isyu sa allowances sa mga huwes nga giwagtang samtang ang dakbayan migahin gyud hinuon og P1 milyon nga Equalization Fund alang sa mga allowances sa mga huwes nga gipangtangtangan og allowances sa mga LGU.

“I would like to assure Mayor Osmeña that 99.9 percent of judges in Cebu do not decide on the basis of whether they receive allowances or not, but according to the facts and the law,” dugang pa sa Kongresista.

Matud pa niya nga kun mao kini ang pagtan-aw sa mayor ngadto sa mga huwes, daw iyaha nang gidudahan daan nga mabayran pinaagi sa allowances ang mga huwes.

 “Osmeña is implying that judges of Cebu can be bought by paltry allowances. Of course, what can one expect, really, from someone who has a low regard and opinion of everyone but himself?” nagkanayon siya.

Dako ang pagsalig ni Garcia nga ang mga huwes gigiyahan ug mosunod sa mga patakaran sa Supreme Court ug di mobali niini gumikan lang sa paghatag sa mayor kanila og P1 milyon.

Duna hinuoy tambag si Garcia ngadto kang Osmeña, kini mao ang pag-ingon “If that’s the way things work in your world, that’s not the way things work in the judiciary.”

Samtang hasta ang mga konsehal sa dakbayan apil usab sa gitambagan ni Garcia sa pag-ingon “If they do not want to debate, they should just say so. That’s all right. But do they have to insult the judiciary in the process?”

Ang pagpanginlabot sa Kapitolyo sa pagbaligya sa mga luna sa South Reclamation Area gidudahang nagsugod dihang napakyas ang land swap deal tali sa lalawigan ug sa dakbayan nga makaapekto sa kapin 5 mil ka mga residente sa dakbayan nga nag-okupar sa mga luna sa lalawigan dinhi sa dakbayan. - Rey Pasaporte gikan sa The Freeman (BANAT NEWS)