Tulo naangol sa pagpanulong

CEBU, Philippines – Tulo ka lalaki ang nasamdan sa pagpanulong nga gikalambigitan sa managparyente sa Lower Torre, sitio Malipayon barangay Inayawan.

Giila ang nasamdan mao si Crisanto Lansang, 26, pag-umangkon niining 14-anyos ug ang 17-anyos nga anak sa usa sa mga suspetsado nga pulos molupyo sa nahisgutang lugar ug managparyente ra.

Ang gitumbok nga mipusil, midunggab ug mikulata kanila mao sila si Vicente Abangan, 50, igsuon niining si Rolando Abangan ug ang pag-umangkong si Jimmark Abangan.

Sa imbestigasyon sa kapolisn nasayran nga si Lansang ug ang iyang pag-umangkon diha sulod sa ilang panimalay kauban sa ilang mga kaliwat dihang kalit lang nga nanulod ang mga suspetsado.

Gikatahong pulos nagbitbit og mga hinagiban hinungdan nga nanagan ang ubang mga kaliwat apan si Crisanto ug ang 14-anyos nga pag-umangkon niini nahibilin ug maoy gipangdunggab.

Si Lansang natigbasan sa ilong samtang ang 14-anyos napusilan sa walang bukton.

Human sa panghitabo daling mieskapo ang tulo padulong sa gi-parking nga jeep diin ang 17-anyos nga anak ni Rolando Abangan nagpahuway, ang gikahibugngan sa kapolisan mao nga giapil usab kini og duslak sa amahan.

Ang batan-on bisan nagtaop pa ang sundang sa iyang buko-buko mikaratel nalang og dagan. Ang mga tanod midakop sa mga suspetsado samtang ang mga biktima daling gidala sa Cebu City Medical Center.

Nakuha sa kapolisan ang kalibre .357 rebolber nga anaay duha ka buhing bala, duha ka kabhang sa kalibre .38; guna ug crew bar nga adunay gitas- on nga upat ka tiil ug usa ka pulgada. Ang mga suspetsado mihimakak sa pasangil kay ilaha ra silang gisumbag tungod sa pagpunay og hatag ni Lansang og rugby sa iyang anak, samtang ang iyang pagduslak sa anak agi kini og disiplina. Matud pa ni PO2 Lou Pagara nga ang magsuong si Rolando ug Vicente Abangan adunay kasong Frustrated Murder niadtong Abril 1996. (Lesley Caminade) (BANAT NEWS)