'Right hand' ni Aves nadakpan

CEBU, Philippines – Nasikop na sa kapulisan sa dakbayan sa Sugbu ang usa sa Top Ten Most Wanted dinhi sa dakbayan nga nalambigit sa patay sa mga bangi sa fraternity pipila na ka tuig ang nakalabay nga kauban ni Aristotle Aves.

Si Chief Insp. George Ylanan, hepe sa Investigation and Detective Management Branch (IDMB) sa Cebu City Police Office dihang gikahinabi sa Banat News mibutyag nga ila nadakpan si Santos “alias Sonny” dela Cruz.

Si dela Cruz gikatahong right hand sa gipasanginlang hitman sa Alpha Kappa Rho (AKRHO) nga si Aves kinsa natanggong na sa Cebu City Jail ug nag-atubang og daghang mga kaso.

Si De la Cruz nadakpan niadtong Miyerkules sa hapon sa mga sakop sa Mambaling Police Station diha sa sudlunong bahin sa B. Aranas St., sa barangay Duljo Fatima ning dakbayan.

Dunay patong nga ganti sa ulo ni dela Cruz sa dakbayan nga gilambigit sa mga pagpamusil dihang kusog pa kaayo ang frat war batok sa Tau Gamma Phi fraternity.

Gisubay na tanan karon sa kapolisan ang mga kasong naglambigit kaniya.

Si dela Cruz nasikop pinasikad sa warrant of arrest gikan sa sala ni Judge Eric Menchavez sa Regional Trial Court (RTC21) gumikan sa kasong frustrated homicide niadtong Pebrero 24, 2006.

Sila si Sr. Inspector Pablo Cabildo ang hepe sa Mambaling Police Station nga nag-roving maoy nakabantay sa presensya niini apan pagkakita kanila dali kining mikaratel og dagan apan nadakpan ra gihapon sa kadugayan.

Gihulagway ni Cabildo nga idlas si dela Cruz ug taud-taud na nilang gipangita.

Ang akusado nga gikahinabi sa Banat News nagkanayon nga nakurat nalang siya dihang gidakop ug gipakitaan og warrant of arrest kay matud pa niya gibutang-butangan lang siya.

Giangkon niini nga nabilanggo na siya’g onse ka bulan niadtong 2006 gumikan sa kasong homicide ug illegal possession of firearm apan pulos kini gibasura sa korte.

Gihimakak usab niini ang pasangil nga kakunsabo siya sa mga krimeng gipanghimo ni Aves ug nagtuong naamong lang siya tungod kay brod sila niini sa frat. - BANAT NEWS