Bayan ug PNP mayo na og relasyon

CEBU, Philippines – Ang nakab-ot nga kasabotan tali sa kapolisan ug sa Bayan Muna Central Visayas bahin sa wala nay kihaay sa nahitabong kagubot ug kaguliyang sa demolisyon nga gipahigayon sa kapolisan didto sa sitio Kalubihan, barangay Talamban ning dakbayan sa Sugbo sa miaging adlaw maoy magsilbing giya aron sa hingpit makabaton na og maayong relasyon ang mga cause oriented groups ug ang mga otoridad.

Matud pa ni Arman Perez ang lider sa Bayan, nga sa pagkakaron aduna nay open communication ang ilang grupo ug ang kapolisan sa kagamhanan.

Kini human mahusay ang kagubot sa mga molupyo ug kapolisan didto sa Kalubihan ug nagkasabot nga wala nay kihaay.

Sa sayo pa mibahad ang mga molupyo nga mopasaka sila’g kiha sa kapolisan kay matud pa gipangulata sila, samtang sa bahin usab sa kapolisan mibahad usab kini mokiha gumikan sa gihimong obstruction of justice kon pagbabag nga gihimo sa katawhan batok sa demolition team sa gobiyerno.

Gumikan sa gihimong panagsabotsabot nila ni Perez ug sa mga kadagkuan sa Cebu City Police Office nga gipangunahan ni Sr. Supt. Patrocinio Comendador, nagkauli ang maong relasyon sa mga sakop sa cause oriented group ug sa kapolisan.

Matud ni Perez nga ang maong kaugmaran maoy mahimong   sumbanan aron dili na masubli ang mga kaguliyang nga maglambigit sa kapolisan ug sa mga katawhan gumikan lang sa dili pagsinabtanay. (Guam Logroño) (BANAT NEWS)