Provincial Board midayeg sa DOT ug CCEF

CEBU, Philippines – Gikalipay sa mga sakop sa hunta probinsiyal ang pagpakigtambayayong sa Department of Tourism (DOT) ug sa Coastal Conservation and Education Foundation (CCEF) alang sa pagpreserbar ug pagprotiher sa mga kadagatan ning lalawigan.

Kini tungod kay makabinipisyo usab sa maong programa ang mga pipila ka mga lugar dinhi sa lalawigan nga angayang protektahan tungod kay nahimo nang tourist destination.

Si provincial board member Victor Maambong miingon nga ang DOT mipagawas og pundo alang sa solid waste management program sa Boracay island dihang pipila ka mga turista ug mga molupyo mireklamo sa kabaho sa landfill gikan sa silingang lugar sa sikat na kaayong tourist destination sa nasud.

Si Maambong miingon nga dinhi sa probinsiya sa Sugbo, ang Malapascua island sa lungsod sa Daanbantayan giisip sa CCEFC nga usa sa mga world class diving site  sa tibuok nasud.

Apan nasayran niining bag-o nga ang maong isla nagnihit na ang lugar nga kalabayan sa ilang mga basura.

Kini ang hinungdan nga ang solid waste management program nga gipatuman sa Boracay gipatuman usab sa DOT ug sa CCEF sa isla sa Malapascua aron matubag ang maong problema nga nakahasol na usab sa mga turista ug mga molupyo.

Nagkanayon si Maambong nga nagpasalamaton kaayo ang kagamhanan sa probinsiya sa Sugbo sa DOT tungod sa pagpagawas dayon sa P300,000 alang sa solid waste management program sa Malapascua. (Chester Abadilla) (BANAT NEWS)