CEBU, Philippines – Ang hepe sa Cebu Provincial Police Office (CPPO) nga si Supt. Carmelo Valmoria mipasalig nga moluwat siya og order sa paghimo ni Superintendent Henry Binas nga mahimong permamenteng hepe sa Talisay City Police Station.
Matud ni Valmoria nga natagbaw siya sa performance ni Binas ug gibutyag niini nga sa paglingkod ni Binas isip hepe sa Talisay mikunhod ang mga insidente sa krimen sa siyudad.
Kahinumduman nga ang konseho sa dakbayan sa Talisay milig-on sa resolusyon nga gipangamahanan ni Konsehal Arturo Bas, ang tsirman sa komitiba sa kahapsay ug kalinaw nga nag-awhag kang Valmoria nga himoong permamenteng hepe sa Talisay si Binas.
Si Bas sa pakighinabi sa Banat News kagahapon nagkanayon nga mapasalamaton sila ug ilang gihangop ang pasalig ni Valmoria kanila. Matud ni Bas nga dako ang ilang pagsalig kang Binas sa pagdumala niini sa TCPS ug ilang nakita ang kaaktibo karon sa kapolisan sa pagpahigayon og mga operasyon sama sa mga checkpoints ug roving diha sa kadalanan.
Sa laing bahin, si Binas sa pakighinabi niini sa Banat News kagahapon nagkanayon nga mapasalamaton siya sa mga pagsalig nga gihatag ngadto kaniya.
Apan iyang gipasabot nga usa lang siya ka administrador sa TCPS ug kung wala usab ang ayuda sa iyang mga sakop ug sa mga multiplier force nga mao ang Talisay City Intelligence Branch (TCIB) dili mahimong malampuson ang tanan niyang buhaton sa pagsumpo sa kriminalidad sa Talisay.
Si Binas midugang nga dili siya mosaad tungod kay dili mahibaw-an ang mga moabot nga mga hitabo apan iyang paningkamuton kutob sa iyang mahimo sa paghatag og serbisyo ngadto sa mga Talisaynon ug sa pagmentenar sa kahapsay ug kalinaw sa siyudad. (Brenda D. Batuto ug Guam Logrono) (BANAT NEWS)