Babaye giluba sa misis sa ka-textmate

CEBU, Philippines - Kritikal ang kahimtang sa usa ka babaye human kini dunggaba sa asawa sa lalaking iyang textmate didto sa Barangay Bambang, lungsod sa Cordova sa milabay'ng udto.

Ang biktima mao si Ma. Liwaya Cosicol, 27, minyo, residente sa Sitio Matab-ang, barangay Day-as lungsod sa Cordova.

Samtang gitumbok nga midunggab kang Cosicol mao si Elizabeth Cumayas, 36, minyo ug residente usab sa   Day-as ug silingan sa biktima.

Base sa imbestigasyon sa kapolisan sa lungsod sa Cordova nasuta nga samtang sakay sa usa ka traysikad si Cosicol padulong sa Poblacion Cordova ug pag-abot sa Sitio Bangbang kalit lamang kining giduol ni Cumayas dayong dunggab.

Si Cosicol nahiagum sa duha ka samad dinunggaban sa tiyan gamit ang usa ka siyam ka pulgadang kutsilyo. Gidali kini og dala ngadto sa Tojong Hospital apan wala kini dawata.

Gumikan niini gidala si Cosicol sa Mactan Doctors Hospital ug kasamtangan giobserbahan sa mga mananambal.

Samtang nakuha sa kapolisan ang kutsilyong gigamit ni Cumayas sa pagdunggab niya ni Cosicol human kini niya mabiyai sa dapit nahitabuan sa dihang misibat kini.

Matud pa ni PO1 Lauro Laurel sa Cordova Police Station   nga gumikan sa pagduda ni Cumayas nga si Cosicol ang kanunay nga textmate sa bana niini hinungdan sa iyang pagpangabubho. – BANAT NEWS