Mipasilong kay uwan giluba patay

CEBU, Philippines - Gidunggab patay ang usa ka 51 anyos nga lalaki nga igo lang mipasilong sa tindahan kay naabtan og   ulan, didto sa Lutopan, siyudad sa Toledo niadtong Lunes sa alas 3:00 sa hapon.

Ang biktima mao si Angel Estrellado, 51, minyo, nga taga Lutopan, samtang ang suspek mao si Rodrigo Fabrua, 50, nga silingan ra sa biktima.

Si PO1 Celso Maquidato sa Toledo City Police Station mibutyag sa  Banat News nga ang biktima naglakaw lang sa dalan dihang naabtan og ulan hinungdan nga mipasilong sa tindahan ni Bobby Ledesma ug nagpaabot nga motuwak ang ulan.

Apan sa walay igong hinungdan kalit lang kining gidunggab sa suspek gamit ang hait nga plamingko ug maayong pagka igo sa dughan sa biktima hinungdan nga nalup-og kini sa yuta.

Diha-diha gihatod dayon sa mga silingan ngadto sa Toledo City District Hospital apan gideklarar kini nga dead on arrival (DOA).

Samtang ang suspek abtik kaayong nakasibat ug padayon pang gipangita   karon sa kapolisan.

May katahap ang mga nakasaksi nga panagdumot ang hinungdan sa maong pagpanunggab. - Darrel A. Carumba (BANAT NEWS)