Ex-PC tighimo'g peke nadakpan

Cebu Philippines - Usa ka kanhi sakop sa Philippine Constabulary ug usa ka lalaki   gidakop sa kapolisan human giingong maoy tighimo og mga mini nga kwarta atol sa gipahigayong entrapment operation sa Provincial Intelligence Branch (PIB) kagahapon sa alas 8:30 sa buntag sa barangay Pooc dakbayan sa Talisay.

Ang duha ka akusado ug gikasuhan og counterfeiting mao ang manag-agaw'ng sila si Rogelio Oblinar, 49, usa ka kanhi sakop sa PC nga taga Panabo City sa Davao del Norte ug Andrew Oblinar. 50, taga lungsud sa Sta. Cruz, Davao del Sur, samtang nakasibat ang laing kauban sa duha nga ginganlan lang og Allan.

Sila si Rogelio ug Andrew nasakmitan og mga kahimanan paghimo'g mini nga kwarta, sama sa US bond paper; kemikal nga gamiton sa pagprinta; plantsa ug uban pa.

Nabawi usab sa kapolisan ang P200 mil nga marked money nga gigamit sa kapulisan sa entrapment.

Si Chief Insp. Elma delos Santos ang hepe sa PIB mibutyag sa mga tigbalita nga ang duha niadto pang Disyembre nila gipanid-an human makadawat og report labot sa pagpalusot nila og pekeng kwarta.

Matud pa niini, nga modus sa duha nga mangilad sa ilang mga biktimahon pinaagi sa paghaylo og 'magic-magic' nga mo-imprinta sila'g kwarta atubangan mismo sa ilang biktimahon, apan sa pagkatinuod, orihinal nga kwarta ang ilang ihatag sa biktima.

Gumikan kay tinuod man ang kwartang 'sampol' nga ipakita, mahaylo gyud ang mga biktima ilabi na nga ang pasalig kanila nga kaupaton ang kantidad sa kwartang ibayad sa mga magpaprenta og kwarta.

Apan human madawat ang kwartang bayad sa mga biktima giingong kalit nga mangikyas ang mga suspek dala ang salapi sa mga biktima.

Sumala pa ni delos Santos, nakadawat sila og report nga nabalik na dinhi sa Sugbu ang duha niadto pang Pebrero hinungdan nga ilaha kining gipangita ug nasigpatan kagahapon sa buntag ug daling gihimo ang entrapment diha sa barangay Pooc, Talisay.

Dihang gipahiling sa mga representante sa Bangko Sentral ng Pilipinas ang kwartang 'giprenta' sa mga suspek nasuta nga kun ang pagka-imprenta ang tan-awon makailad gyud kini kay daw tinuod gyud nga kwarta, gawas lang sa sayop nga serial numbering.

Si Rogelio mibutyag nga duha palang siya ka tuig nga nag-operate sa maong pagpangilad tungod kay gikapoy na siya sa pagpunay'g balik-balik sa Manila sa pag-follow-up sa iyang mga dokumento may labot sa iyang pag- AWOL sa PC niadtong 1988.

Si Sr. Supt. Carmelo Valmoria nagtuong ang maong kwarta posibleng gamiton sa politika   gumikan kay nagsingabot usab ang election karong sunod tuig.(Guam Logroño) (BANAT NEWS)