CEBU, Philippines - Nagtingkagol sa detention cell ang usa ka hubog human kini manghagis, nani-on og armas ug nagpasalba pa gyud sa mga kawani ug kustomer sa Rock Bar Beach didto sa barangay Talisay, lungsod sa Sta Fe, niadtong Domingo sa alas 11:55 sa gabii. Ang nagpahayahay sa karsel mao si Pacito Pacenio, 32, ulitawo, nga taga Talisay, Santa Fe.
Gisikop sa kapolisan si Pacenio human moreklamo si Anjee Theresa, trabahante sa maong bar ngadto sa kapolisan kay matud pa mikalit lang og sulod sa balay kalingawan si Pacenio,unya nanghagis ug nanghagit og away ug wala pa gyud matagbaw nanion pa og armas ngadto sa mga kustomer sa maong bar.
Gumikan kay wala may mipalit sa iyang hagit, migara ang suspek ug nagpasalba sa iyang armas de fuego hinungdan nga nangurog sa kakuyaw ang mga kustomer ug gani ang ubang trabahante sa bar misirit og dagan sa kahadlok nga tirohan sila ni Pacenio.
Si PO2 Anthony Illut sa Sta. Fe Police Station mibutyag sa Banat News nga human nila madawat ang reklamo, gisikop dayon nila ang suspek ug gibalhog dayon sa prisohan. .
Gisuta sa kapolisan kon lisensyado ba ang armas de fuego sa maong suspek aron ikapasaka ang tukmang kiha batok kaniya. (Darrel A. Carumba) (BANAT NEWS)