Naligsan sa motor tiil nabali

CEBU, Philippines - Nabali ang tiil sa usa ka 13 anyos nga lalaki human kini maligsi sa motorsiklo sa iyang paglabang sa karsada didto sa Poblacion, lungsod sa Boljoon niadtong Domingo sa alas 2:40 sa hapon.

Ang biktima mao si Neil Luis Villanueva, 13, nga taga Poblacion, samtang ang drayber sa motorsiklo nga nakaligis kaniya mao si Rommel Semaringga, 25 , taga sitio, Cansumap-ang barangay Lunop sakop sa maong lungsod.

Si SPO2 Carlito Amarillo sa Boljoon Police Station mibutyag sa Banat News nga ang motorsiklo nagpaingon sa public market ug sa pag-abot niini sa maong lugar kalit lang milabang ang biktima busa nadasmagan kini sa motor.

Sa pagkatumba niini nalatayan gyud ang iyang bitiis hinungdan sa pagkabali niini ug gidali paghatud sa tambalanan sa dakbayan sa Sugbo.

Samtang ang drayber sa motorsiklo nga nakadasmag boluntaryo usab nga mitahan sa iyang kaugalingon ug nagtingkagol na karon sa detention cell samtang nagpaabot sa tukmang kaso nga ipasaka batok kaniya.