School principals gi-seminar sa seguridad

CEBU, Philippines - Gipaubos kagahapong adlawa sa usa ka security seminar ang tanang principal sa public elementary ug high school sa siyudad sa Sugbu aron mapalig-on na ang seguridad sa publikong mga tunghaan sa dakbayan sa pagsugod sa sunod-tuig tingtungha.

Matud pa ni Cebu City Schools Division Superintendent Doctor Lorna Rances nga dili sila buot nga masubli pa ang nahitabo kaniadto diha sa Mambaling Elementary School nga dunay usa ka tinun-an sa kinder nga pag-umangkon ug consultant sa Cebu City Hall ang yanong gikuha ug gidala sa usa ka babaye nga dili niini kaila.

Nauli ra hinuon ngadto sa inahan ang bata dihang nabaniog ang maong hitabo ug gituuhang nahadlok ang gidudahang kidnapper sa bata.

Nasayran nga ang usa sa mga speaker sa gipahigayong seminar mao mismo si Cebu City Police Office Director Senior Superintendent Patrocinio Comendador.

Ang mga principal gimanduan pagsumitir og action plan nga maoy gusto niining ipatuman sa ilang tagsa-tagsa ka tunghaan.“Gimanduan sila pagsumitir og action plan nga ilang ipatuman sa next school year kay sila may labing nasayod sa problema sa ilang tunghaan,” sumala ni Rances.

Karong adlawa, ang mga security coordinator na usab sa matag tunghaan sa dakbayan maoy ipaubos sa nahisgutang security seminar.

Kini aron mao na ang mopahibawo sa mga security guard, barangay tanod ug uban pang mga volunteer nga mobantay sa mga tunghaan.

Gawas sa safety ug security seminar gilakip usab ang pagtudlo sa health and sanitation.

Malaumon si Rances nga human sa seminar, mapalambo na ang seguridad ug ang kalimpyo sa 68 ka public elementary ug 55 ka public high school sa siyudad. (Elly Bolonos) (BANAT NEWS)