Tulo ka anggulo ang gisusi sa kapolisan

CEBU, Philippines - Tulo nalang ka anggulo ang gisubay sa mga imbestigador sa kapulisan labot na sa pagpusil patay kang Engineer Maliquias Ceballo niadtong miaging semana sa barangay Pitogo lungsod sa Consolacion.

Kini maoy gipahibalo ni Sr. Supt. Carmelo Valmoria ang direktor sa kapulisan sa lalawigan sa Sugbu subay ning nagpadayon nilang imbestigasyon sa kaso nga hangtud karon wala pay matumbok nga mga suspetsado.

Si Valmoria nagkanayon nga ila nang gisalikway ang anggulo sa love triangle sa maong kaso ug gisubay na usab ang nahibiling tulo ka anggulo sa kaso.

Kini mao ang may kalambigitan sa kinihaay nila sa igsuong polis nga si SPO1 Silas Ceballo, ang hepe sa traffic division sa lungsod sa Compostela ug ig-agaw nga si SPO2 Ramon Perales.

Ang duha gipasakaan og grave misconduct, ingon man ang laing kaso may kalambigitan sa ilang yuta ug ang ikatulo mao ang kalambigitan sa trabaho sa biktima.

Sumala pa niini, nga wala na sila karon mo-focus sa anggulong love triangle gumikan kay wala gyud mogawas sa imbestigasyon nga nalambigit ang mga babaye niini sa krimen.

Nunot niini iyang gimanduan si Sr. Insp. Jesus Elmer Fernandez sa pagpadali sa ilang imbestigasyon sa maong kaso ug gipanghinaot nga duna pay dugang mga testigos nga mopatim-aw.

Giklaro niini nga sa pagkakaron wala pa gyud sila makakuha'g cartographic sketch sa tulo ka mga mamumunong nagsakay'g motorsiklo.

Samtang gipaabot pa ang resulta sa paraffin test sa nahisgutang duha ka polis, ang duha boluntaryong nagpakuha niini aron paglimpiyo sa ilang pangalan.

Nagdumili usab si Valmoria sa pagbutyag kun unsay sulod sa mensahe sa cellphone sa biktima nga gihiling na usab karon sa mga imbestigador sa Criminal Investigation and Detection Group (CIDG-7).

Nasayran nga padulong na untang motrabaho si Ceballo dinhi sa dakbayan sa Sugbu gikan sa panimalay niini sa lungsod sa Compostela sakay sa Toyota Hilux nga pickup dihang gipauwana'g mga bala sa tulo ka mga suspetsadong nag-motorsiklo ug nag-helmet. (Guam Logroño) (BANAT NEWS)