Illegal recruiter na-entrapped

CEBU, Philippines - Usa ka gipasanginlang illegal recruiter ang nadakpan sa entrapment operation sa mga sakop sa Investigation and Detective Management Branch (IDMD) sa Cebu City Police Office kagahapon sa alas 10:00 sa buntag sulod sa usa ka food chain diha sa uptown area.

Ang nadakpan mao si Simplicio Ypon, 54, taga sitio Purok barangay Sto. Niño dakbayan sa Toledo human dawata ang P1000 ka pesos nga marked money sa mireklamong tulo ka mga gisaaran niining palargahon sa Arizona, U.S.A.

Ang mga sakop ni Chief Insp. George Ylanan, sa IDMB nga sila si PO2 Roy Veloso ug mga kaubanan maoy misignit kang Ypon human midawat sa maong kwarta nga iyang gipangayong dugang bayad sa mga biktima nga nakahatag nang daan og P20 mil ug P30 mil.

Si Ypon nagpailang konektado sa Regal Vision International Manpower Inc. nga nakabase sa Malate City sa kauluhan apan nasuta nga wala kini legal personality ngadto sa maong agency ug gipanghimakak nga ilaha kining sakop. Ang akusado mipasalig sa iyang mga biktima nga palargahon ngadto na sa Arizona, USA aron makatrabaho sa housekeeping ug niadtong Sabado mi-contact kanila ang suspek nga makigkita sa usa ka kan-anan sa uptown area hinungdan nga ang mga biktima daling nireport sa mga sakop sa IDMB. Gikatahong duna pay laing 20 ka mga reklamante ang mitumbok sa suspek nga nailad usab niini.

Ang akusado miangkon sa mga sakop sa media nga dili gyud siya konektado sa maong ahensya gumikan kay gihatagan lang siya'g instruction pinaagi sa e-mail nga mang-recruit.

Miila usab siya sa usa ka Nepomuceno Amable Jr. nga vice president sa maong agency apan dihang gisusi sa kapulisan ang koneksyon niini bakak usab diay kini, ang maong ahensya mipahibalong mopadala og representante dinhi aron mopasaka usab og kaso batok kang Ypon gumikan sa paggamit sa ilang pangalan. (BANAT NEWS)