Sen. Villar mitambong sa BOFAMCO assembly

CEBU, Philippines - Misaad og dugang P5 milyones nga hinabang pinansyal si kanhi Senate president Manuel Villar atol sa asembliya sa mga mag-uuma sa Bohol niadtong Sabado sa hapon.

Si Villar daan nang mihatag niadtong 2006 sa Bohol Farmers Multi-Purpose Cooperatives kon BOFAMCO og P5 milyones isip hinabang sa mga mag-uuma samtang matag tuig gikatahong naghatagan usab og P3 milyones ang senador sa lalawigan alang gihapon sa mga mag-uuma nga giingong usa sa nakatampo sa pagsaka sa produksyon sa bugas sa maong lalawigan.

Si Villar nga nabaniog nang modagan sa pagka-presidente sa 2010 presidential elections, mitambong sa 6th Annual General Assembly sa Bohol Farmers Multi-Purpose Cooperatives kon BOFAMCO diha sa Pilar, Bohol, kini maoy labing dakong kooperatiba sa lalawigan sa Bohol nga may kapin sa 3 mil ka mga sakop.

 Pakyas usab si Bohol Gov. Erico Aumentado pagtambong sa maong tigum apan girepresentahan kini sa iyang kapikas nga si First Lady Grenie Aumentado, ug Vice Gov. Julius Herrera.

Sa pagpakigpulong ni Villar sa liboan ka mga miyembro sa maong kooperatiba gipahinumduman niya sila sa iyang kaagi gikan sa pagkakabus hangtud na sa iyang estado karon.

Human sa iyang pakighimamat sa mga sakop sa kooperatiba nakigtigum gihapon siya sa mga mayor sa maong probinsiya. - BANAT NEWS