CEBU, Philippines - Mga polis nga off-duty gidid-ang manulod sa mga buwangan diha sa ilang lugar kundili sila gustong mag-atubang og kasong administratiba sumala pa sa luyo-luyong hepe sa Cebu Provincial Police Office nga si Supt. Erson Digal.
Si Digal mipasabot nga bawal gyud sa mga polis nga mosulod sa buwangan sukad pa kaniadto bisan pa man kun off-duty tungod kay pabiling gipatuman ang direktiba sa PNP nga gipagawas sa kanhi direktor niini ug karon Senador Panfilo Lacson.
Matud pa ni Digal nga ang direktiba ni Lacson wala pa ibasura maong magamit pa gihapon kini batok sa magpabadlong nga polis.
Dili palang dugay mipahimangno usab si Police Regional Office-7 director Chief Supt. Federico Terte niadtong mga polis nga nabaniog na nga protektor sa mga ilegal nga sugal sa ilang mga dapit, susama gihapong silot ang nagpaabot kanila matud pa sa maong opisyal.
Sumala pang Digal kini gumikan kay kini maoy nakapasamot sa kaguba sa dungog sa kapolisan sa mata sa publiko.
Si Terte nagkanayon sa iyang kamandoan, duna na siya'y mga sakop nga gitahasan sa pag-monitor sa mga polis nga giingong tigpasiugda ug protektor sa ilegal nga sugal sa ilang mga dapit.
Sakop sa maong direktiba ang tanang police units sa rehiyon. - BANAT NEWS