ICRC worker nga bihag sa ASG naluwas

CEBU, Philippines - Usa sa bihag sa bandidong Abu Sayyaf nga volunteer sa International Red Cross Worker ug Swiss national nga si Andreas Notter naluwas sa mga polis human kini masigpating naglakaw-lakaw padulong sa Poblacion sa lungsod sa Indanan, Sulu.

Si Interior Secretary Ronaldo Puno sa press conference sa balay ni Sulu Gov. Abdusakur Tan nagkanayon nga si Notter na-recover sa mga polis sa lungsod sa Siasi ug mga Civilian Emergency Forces sa barangay Manilop, Indanan mga alas 5:30 sa buntag kagahapon.

Si Notter ug kaubanang volunteers sa ICRC nga sila si Eugenio Vagni usa ka Italiano ug Filipinang si Mary Jane Lacaba gisignit niadtong bulan sa Enero. Si Lacaba una nang gibuhian niadtong Abril 2.

Ang mga bandido mibahad nga putlan og liog ang mga bihag kung dili mo-withdraw ang kapolisan ug militar diha sa Sulu, butang nga wala itugot sa gobiyerno hangtud nga miapil na ang Ulama, pundok sa mga relihiyosong Muslim sa maong

probinsya nga motabang sa negosasyon.

Niadtong milabay’ng Biyernes, ang grupo sa mga negosyador miisa na sa ilang mga kamot gumikan sa pagmagahi sa mga bandido ug mimando sa militar ug kapolisan sa paglusad og rescue operation. Dako ang pagtuo ni Puno nga nahadlok ang mga bandido sa gihimo sa militar ilabi na dihang nasigpatan sila sa mga polis ug civilian volunteers maong napugos sila sa pagsibog ug kagahapon sa buntag nasigpatan sa polis si Notter ug giluwas.

Wala hinuoy gikareport nga dunay nahitabong engkwentro tali sa duha ka habig apan dako ang pasalamat ni Puno ug ni Tan nga luwas si Notter kinsa ilaha dayong gidala sa panimalay sa gobernador. Si Notter gihulagway nga naa sa maayong panglawas gawas lang sa pagmenus sa timbang niini ug kahapo sa panglawas hinungdan nga gipatan-aw na kini sa mga doktor.

Ang tigpamaba sa ICRC nga si Anastasia Isyuk dako ang pasalamat sa maong kalamboan apan nabalaka pa gihapon sa kahimtang sa masakitong si Vagni nga pabilin pang naa sa mga kamot sa mga bandido.

Ang Malacañang mipasalig nga buhaton ang tanan pagpugos sa mga bandido nga buhian si Vagni, si Vagni gikatahong dunay sakit nga hernia ug kinahanglang maoperahan.

Samtang ang Sugbuanong Press Secretary nga si Cerge Remonde nagkanayon nga ang pagkaluwas kang Notter naghatag og paglaom sa mga gobiyerno nga makuhang luwas si Vagni.  (BANAT NEWS)